Вториот круг преговори меѓу Израел и Либан започнува денес во ВАШИНГТОН, додека продолжувањето на преговорите меѓу САД и Иран, кои требаше да се одржат оваа недела во Пакистан, стана под знак прашалник, пишува Гардијан.
Убиството на новинарката ги засени преговорите
Либан има намера да побара едномесечно продолжување на прекинот на огнот што истекува во недела.
Сепак, и покрај десетдневното примирје, израелските сили вчера убија најмалку пет лица во јужен Либан, вклучувајќи ја и либанската новинарка Амал Калил.
Либанскиот претседател Џозеф Аун реагираше на нејзината смрт, велејќи дека Израел „се обидува да ја скрие вистината за својата агресија врз Либан со систематско и намерно таргетирање на новинари“.
Пакистан ја чека одлуката на Техеран
Во меѓувреме, Пакистан останува подготвен да биде домаќин на потенцијални разговори меѓу американските и иранските преговарачи.
Пакистанскиот министер за внатрешни работи Мохсин Накви изјави денес во Исламабад, по средбата со американската амбасадорка Натали Бејкер, дека се надева на „позитивен потег“ од иранската страна.
Во соопштението од пакистанското Министерство за внатрешни работи се наведува дека тие разговарале за дипломатските напори за повторно свикување на преговори за прекин на огнот меѓу САД и Иран. Разговорите беа одложени откако Техеран не потврди кога ќе ја испрати својата делегација.
Накви рече дека пакистанскиот премиер Шехбаз Шариф и началникот на армијата Асим Мунир вложуваат напори „на сите нивоа“ за поддршка на мирно решение и се надева дека сите страни ќе ѝ дадат шанса на дипломатијата.