Управата за хидрометеоролошки работи на Република Македонија до Регионалниот центар за управување со кризи достави исзвестување дека во наредните денови ни следува значителна промена на температурата, односно значително заладување и силен ветер.
Од недела попладне се очекува значителна промена на времето, што ќе биде проследена со зголемена облачност, локален дожд и умерен до засилен западен ветер (над 60км/ч.) кој во вечерните часови ќе го промени правецот во северен и ќе предизвика осетно опаѓање на температурата.
Заладувањето ќе биде поизразено во северните делови од земјата, а во останатите подрачја ќе се почувствува од понеделник, кога ќе преовладува променливо облачно и посвежо време со сончеви периоди. Дневната температура ќе биде пониска за околу 6-7 степени во однос на денешната и ќе се движи од 24 до 30степени, а слични температури се очекуваат и во текот на целата недела. – стои во извештајот на дежурниот синоптичар на УХМР, Ленче Ризова.