Политиката на едно дете која со децении се спроведува во Кина доведе до намалување на женската популација, а забележително намалување на бројот на бракови.
Младоженците сега треба да платат за обичајот за купување невеста, на кој се повеќе луѓе се спротивставуваат.
Во градот Даиѓап неодамна се одржа настан за промовирање на бракот без обичај да се купува невеста.
Службениците на овој град во југоисточна Кина собрале жени со намера јавно да се откажат од практиката „висока цена на невестата“, свадбен обичај во кој мажот дава пари на семејството на својата идна сопруга како услов за свршувачка.
Локалната влада се надева дека луѓето ќе ги напуштат таквите луди обичаи.
Додека Кина се соочува со намалување на населението, официјалните лица се борат со древната традиција на купување невести во обид да ги зајакнат браковите, чиј број се намалува.
Трошоците за купување невеста вртоглаво пораснаа низ целата земја во последниве години, во просек до 20.000 долари во некои провинции, што го прави бракот сè понедостапен.
Плаќањата обично ги вршат родителите на младоженецот.
За сузбивање на оваа практика, локалните власти покренаа пропагандни кампањи како онаа во Даиџап, порачувајќи им на слободните жени да не се натпреваруваат меѓу себе за повеќе пари.
Некои градски власти дури се вклучуваат во преговорите меѓу семејствата.
Меѓутоа, како што се менуваат ставовите во општеството, традицијата наидува на зголемен отпор од јавноста.
Пообразованите Кинези, особено оние во градовите, го сметаат обичајот за патријархална реликвија која ги третира жените како имот што треба да се продаде на друго домаќинство.
Во руралните области каде обичајот е поприсутен, отпорот е уште поголем бидејќи сиромашните земјоделци мора да штедат неколку години или да се задолжуваат за да се венчаат.
И покрај ова, владината кампања наиде на критики бидејќи се чини дека ги зајакнува сексистичките стереотипи за жените.
Кинеските медиуми, опишувајќи го проблемот со зголемувањето на таканаречените исплати за брак, често ги опишуваат жените кои бараат големи суми како алчни.
Многумина се прашуваат, од друга страна, зошто товарот за решавање на проблемот паднал на жените.
Некои корисници на социјалните мрежи ги повикуваат официјалните лица да одржат слични состаноци за мажите да ги научат како да бидат поеднакви партнери во бракот.
„Како и со повеќето државни брачни политики, жените се централна цел во Кина“, рече Гонзало Сантос, професор по антропологија кој ја проучува руралната Кина на Универзитетот во Коимбра во Португалија. Тоа е татковски апел до жените да го одржуваат општествениот поредок и хармонија, да ги исполнат своите улоги како сопруга и мајка“, додава тој.
Политиката за едно дете доведе до непропорционален сооднос меѓу половите
Во текот на четирите децении на политиката за едно дете, родителите често претпочитаа синови, што резултираше со непропорционален однос на половите што ја зголеми конкуренцијата кај жените.
Нерамнотежата е најизразена во руралните средини, каде што сега има 19 милиони повеќе мажи отколку жени.
Многу рурални жени претпочитаат да се омажат за урбани мажи за да добијат дозвола за престој во градот или пристап до здравствена заштита.
Официјалните лица признаваат ограничена способност да се елиминира обичајот, кој за многу семејства е симбол на социјалниот статус.
Во руралните средини, на пример, соседите ги озборуваат жените запросени „по пониска цена“ и се прашуваат што не е во ред со нив, покажува истражувањето за обичаите за купување невести.
Оваа традиција е поврзана и со мислењето за улогата на жената како грижа за семејството.
Во руралните области, обезбедувањето висока куповна цена се гледа од младите, посиромашни семејства како начин за пристап до заштеди.
И како што се зголемува животниот век на родителите, некои жени бараат повисоки цени како компензација за негувањето на постарата генерација.
Социолозите сметаат дека најефективниот начин владата да стави крај на оваа традиција е да инвестира повеќе ресурси во децата и здравствената заштита на постарата популација.
Градовите ширум земјата, пак, се обидуваат да ја популаризираат идејата за свадби без пари, а неодамна Нанчанг беше домаќин на бесплатна масовна венчавка за сто парови на голем спортски стадион.