Во четврток истекува рокот за поднесување барања за легализација на дивоградби

Сподели со своите пријатели

Рокот за поднесување на барање за легализација на бесправно изградени објекти кој беше пролонгиран во четврток истекува.

Со последните измени од Законот за третман на бесправно изградени обејкти беше овозможено поднесување барања за легализација до 31-ви март до подрачните општини каде што се наоѓа дивоградбата.

Услов е објектот што е предмен на легализација да е изграден заклучно со 3 март 2011, а не потоа. За новоподнесените барања е определен рок за доставување на геодетски елаборати дури до крајот на наредната година.

Барања за легализација до четврток ќе може да поднесат и компаниите што имаат инфраструктурни објекти, оптички, бакарни кабли, водоводи и друга инфраструктура.

Согласно законските измени, за до крајот на годинава е пролонгиран рокот за доставување геодетски елаборати за барањата за легализација поднесени во 2011 година. Со тоа, според Министерството за транспорт и врски, би се комплетирала документацијата и општините ќе може да ги решат предметите.

Пролонгирањето на рокот за доставување геодетски елаборат за една година беше направено со цел на граѓаните да им се остави простор да имаат време за достава на елаборатите кои се клучен документ во процесот на легализација, а на геодетските фирми полесно да ја вршат работата бидејќи со претходниот рок немаат доволно време да ги изработат сите поднесени барања.

Сеуште трае и можноста за социјално ранливите категории да добијат бесплатни елаборати. Како што информира викендот министерот за транспорт и врски Владо Мисајловски во отчетот за сработеното, досега се изработени 5.300 бесплатни елаборати за социјални ранливи граѓани.Од почетокот на процесот на легализација што почна во 2011 година досега правен статус добија 147.000 нелегално изградени објекти.

Во претходниот рок, од 2 март до 3 септември 2011 година, беа доставени 360.000 барања за легализација на дивогради.


Comments are closed, but trackbacks and pingbacks are open.