Интервенциите на чешката влада, помошта за домаќинствата со скапи енергенси и поставувањето плафон за цените на струјата и гасот, ја забавија инфлацијата и таа во октомври изнесуваше 15,1 отсто, што е за 2,9 отсто помалку од септември кога достигна рекордni 18 проценти во споредба со истиот месец во 2021 година.
„Во октомври најголемо влијание врз цените имаа владините мерки за домаќинствата во вид на енергетски додаток. Благодарение на тоа и привременото откажување од плаќањата за обновливи извори на енергија, цените се намалени за 1,4 отсто во однос на претходниот месец“, изјави Павел Шедива од Националниот институт за статистика.
Инфлацијата најмногу ја забавија трошоците за домување, додека цените на храната продолжија да растат.
Лебот и пецивата поскапеле за 29,1 отсто, месото за 26,6 отсто, јајцата за 52,8 отсто, овошјето за 7,6 отсто, зеленчукот за 24,4 отсто, шеќерот за 105,4 отсто во однос на истиот месец од претходната година.
Министерот за индустрија и трговија Јозеф Сикела денеска на прес-конференција во Прага изјави дека, поради инфлацијата, Чесите можеби ќе купат помалку божиќни подароци, но дека ќе имаат нормална зима.
Потрошувачката на гас оваа есен од почетокот на грејната сезона е за 28 отсто помала во однос на истиот период од 2021 година, што го фаворизираше и топлото време.
„Нè очекува нормална зима. Можеби помалку ќе се грееме и поради инфлација ќе купуваме помалку подароци и елките во бавчите на куќите ќе останат без осветлување, но изгледа дека сме подготвени за оваа зима најдобро што можеме“, рече Сикела.
Целта на конзервативно-либералната коалициска влада на премиерот Петар Фијала е зимава да ја намали потрошувачката на гас за 15 отсто.
„Нашите магацини се полни до 99 отсто од нивниот капацитет и содржат 3,34 милијарди кубни метри гас. Не планираме да изнајмуваме дополнителни капацитети во странство затоа што треба да остане малку гас во нашите магацини. Во текот на грејната сезона, Чешка треба да се обиде да заштеди 15 отсто од гасот и да го намали на 8,5 милијарди во споредба со минатата година, кога беше 9,3 милијарди кубни метри“, рече Сикела.
Министерот најави дека значително е намалена зависноста на земјата од рускиот гас, кој во Чешка доаѓа преку германски компании.
Во времето на нападот на Москва врз Украина, Прага беше 98 отсто зависна од рускиот гас, а од септември, според Сикела, руски гас воопшто не тече до Чешка, но најголем дел од испораките се од Норвешка. Чешка, исто така, купува ЛНГ гас првенствено од САД.
Сите информации за економско-енергетската криза во Македонија, регионот и светот можете да ги прочитате ТУКА.