Висок севернокорејски дипломат, кој престојувал во Куба, пребегнал во Јужна Кореја, потврдија за Би-Би-Си од безбедносната агенција во Сеул.
Се верува дека политичкиот советник е највисокиот севернокорејски дипломат кој пребегнал во Јужна Кореја од 2016 година.
Дипломатот дезертирал во ноември, соопшти Националната разузнавачка служба (НИС).
Честопати поминуваат месеци пред јавноста да ги дознае деталите за дезертерите, бидејќи дезертерите мора да посетуваат курсеви за јужнокорејското општество пред да можат официјално да станат дел од заедницата.
Јужнокорејските медиуми јавуваат дека тој е советник одговорен за политички прашања во севернокорејската амбасада во Куба.
НИС не го потврди ова за Би-Би-Си.
Весникот „Чосун Илбо“ објави дека го интервјуирал дипломатот, за кој рече дека е 52-годишниот Ри Ил Кју.
Тие додадоа дека тој пребегнал поради „разочарување од режимот на Северна Кореја и мрачната иднина“.
Неговата работа, наводно, вклучувала спречување на Хавана да воспостави официјални дипломатски врски со Сеул.
Сепак, во февруари двете влади воспоставија официјални односи, што се сметаше за назадување за Пјонгјанг.
„Секој Севернокорејец барем еднаш помислува да живее во Јужна Кореја“, рече тој, објави весникот.
Последниот познат висок функционер кој пребегна на југ беше Тае Џонг-хо, кој пристигна во Јужна Кореја во 2016 година.
Тој е поранешен заменик-амбасадор на Северна Кореја во Велика Британија.
Јужна Кореја во неделата за прв пат го одбележа Денот на пребегнувањето на Северна Кореја.
За време на говорот на церемонијата, јужнокорејскиот претседател Јун Сук-Јул вети поголема финансиска поддршка за луѓето кои пребегнале од Северот и даночни олеснувања за компаниите што ги вработуваат.
Jун, кој е конзервативец, има построг пристап кон Северна Кореја и надворешната политика воопшто во споредба со неговиот претходник Мун Џе-ин.
Тој ги поддржува санкциите против режимот на Ким Џонг Ун и рече дека ќе развие технологија за да изврши превентивен напад против Северна Кореја во случај Пјонгјанг да покаже намера да го нападне јужниот сосед.
Овој последен случај на пребегнување доаѓа во време на зголемени тензии меѓу двете Кореи.
Севернокорејскиот лидер Ким Џонг Ун официјално се откажа од обединувањето со Југот.
Тој за малку ќе го нарече Сеул „непријател број еден“, драматичен пресврт од пред шест години кога формално се сретна со јужнокорејскиот лидер Мун Џе-ин.
Оттогаш, има засилена реторика од двете страни.
Двете земји пуштиле пропагандни балони долж пограничните градови.
Во балоните испратени од север имало ѓубре и измет, додека од југ биле испратени пропагандни памфлети.