Лидерите на земјите членки на Европската унија ќе се соберат во четврток и петок во Брисел на самит кој сигурно е еден од најнеизвесните во последните неколку години.
На дневен ред е проширување и ревизија на седумгодишниот буџет, две теми за кои се уште нема консензус.
Во центарот ќе биде унгарскиот премиер Виктор Орбан, кој се заканува со вето на клучните одлуки.
Лидерите треба да одлучат за препораката на Европската комисија за отворање на пристапните преговори со Украина и Молдавија.
Иако препораката е поддржана од 26 земји-членки, не е сигурно дека ќе биде усвоена бидејќи Унгарија се заканува со вето.
Сепак, од Будимпешта доаѓаат сигнали дека би можеле да ја укинат блокадата за помошта за Украина доколку ЕУ ги одмрзне средствата што ги замрзна поради проблемите со владеењето на правото и демократските стандарди.
Балаш Орбан, политички директор во кабинетот на премиерот Виктор Орбан, во интервју за Блумберг изјави дека се подготвени да го отстранат ветото за помошта за Украина, но под услов сите замрзнати средства, кои се околу 30 милијарди евра, да бидат одмрзнати.
Комисијата утре треба да ја соопшти одлуката за одмрзнување на 10 милијарди евра како награда за спроведените реформи во делот на правдата.
Одлуката е веќе подготвена и само се чека новите закони да бидат објавени во службен весник во Унгарија, а од Комисијата велат дека тоа нема врска со претстојниот самит, туку дека само ги следат прописите, пишува Индекс.
Но, прашање е дали тоа ќе биде доволно за Виктор Орбан, бидејќи нешто помалку од 12 милијарди остануваат замрзнати поради проблеми поврзани со заштитата на човековите права, јавните набавки и академската слобода.
Остануваат и 10,4 милијарди евра грантови и поволни заеми од фондот за закрепнување од пандемијата, кои се исплаќаат по спроведувањето на одредени реформи.
Самит ЕУ – Западен Балкан
Пред средбата на врвот на Европската унија, во среда попладне ќе се одржи самитот ЕУ-Западен Балкан.
Европската унија треба уште еднаш да ја потврди европската перспектива на Западен Балкан и да понуди постепена интеграција на тие земји во согласност со напредокот во исполнувањето на критериумите.
ЕУ ќе побара од партнерите од Западен Балкан целосно да се усогласат со заедничката надворешна и безбедносна политика на ЕУ, која главно се однесува на санкциите против Русија.
Во својот пакет за проширување објавен на 8 ноември, Европската комисија му препорача на Европскиот совет, односно на шефовите на држави или влади, да одобрат почеток на преговори со Украина и Молдавија, а за Босна и Херцеговина даде условна препорака, т.е. најави дека ќе препорача отворање на преговорите „тогаш кога земјата ќе постигне доволно ниво на усогласеност со критериумите за членство“.
Украина има поддршка од 26 земји-членки, но не постои консензус потребен за одлука бидејќи Унгарија се противи.
Што се однесува до Босна и Херцеговина, таа има силна поддршка од група земји меѓу кои се Хрватска, Словенија, Австрија и уште неколку други, но и за тоа нема консензус.