Строго раздвојување на девојчињата и момчињата, задолжителни шамии… Четворица средношколци сакале да воведат строги шеријатски правила во своето училиште во Германија.
Четворица муслимански ученици побарале да се воведат строги исламски правила во нивното средно училиште Нордштат во Нојс, град во германската покраина Северна Рајна-Вестфалија.
Како што пренесуваат медиумите, 17-годишник, двајцата 18-годишници и еден 19-годишен ученик барале часовите да бидат строго поделени по пол, мажите да им даваат часови по пливање на момчињата, а жените на девојчињата и дека девојките мора да носат шамии.
Тие барале дури и групите за разговор што постојат за комуникација во класот да бидат поделени по пол, а на муслиманите да им се обезбеди просторија во училиштето каде што ќе можат да се молат и да им биде дозволено да го напуштат училиштето рано во петок за да можат да одат до џамијата.
Медиумите јавуваат дека четворицата на час експлицитно изјавиле дека ја отфрлаат демократијата.
Тие јавно го поддржале каменувањето и другите кршења на човековите права, а на социјалните мрежи циркулираат видеа на салафистички проповедници како што е Пјер Фогел.
Исто така, пишуваат медиумите, вршеле притисок и врз други муслимани кои во нивни очи биле „лоши муслимани“.
Проверени се и родителите, истрагата е во тек
Сето тоа е содржано во полицискиот извештај кој го видел и германскиот јавен сервис WDR.
Управата на училиштето за случајот ја известила полицијата минатиот декември, а за тоа биле информирани и Државната безбедност, јавното обвинителство во Дизелдорф, како и Покраинската канцеларија на криминалистичката полиција (ЛКА).
Наводно, лани имало повеќе инциденти, во март и декември.
За тројца од четворицата студенти се вели дека веќе се пријавени за слични проблеми.
Сепак, истражителите не нашле никаква криминална важност, барем не за инцидентите што се случиле во март.
Јавното обвинителство се уште истражува што се случило во декември, се сомнева дека се работи за закани и принуда.
Како што се наведува во полицискиот извештај, биле проверени и родителите на четворицата обвинети ученици, но не било пронајдено ништо што ја загрозува државата.
Инспекторите ја информирале и провинциската криминалистичка полиција со барање истата да биде проследена до сојузното МВР и Управата за заштита на Уставот.
Превенцијата не успеа
Училиштето се сврте и кон превентивната програма „Вегвајзер“ за екстремни исламисти што ја води Северна Рајна Вестфалија и го покани нивниот експерт да помогне.
Сепак, тоа било неуспешно, се вели во полицискиот извештај.
Провинцискиот министер за внатрешни работи Херберт Ројл (ЦДУ) за весникот „Рајнише пост“ оцени дека случајот е многу сериозен.
Тој ги повика родителите, наставниците и луѓето кои работат со младите да бидат повнимателни за исламистичката радикализација на младите.
„Ако забележите дека нешто се случува, погрижете се за тоа што е можно поскоро. Не смееме да дозволиме нашите најмлади преку пропаганда да паднат во рацете на екстремистичките групи“, рече министерот Ројл.