Ученици и наставници од Полска, Турција, Португалија и Италија деновиве се во посета на свите врсници од кумановската Гимназија „Гоце Делчев“ во рамки на проектот „Онлајн училишно радио“ преку програмата на Европската унија „Еразмус плус“.
За прв пат на овие средби присуствуваат и учениците од Италија, кои поради строгите анти ковид мерки на нивната земја досега беа спречени да патуваат.
– Целта е да се осознае за радио техниките за снимање и емитување на радио програми и тоа се стремиме да ги научиме нашите ученици. Освен главната цел на проектот, другите цели што можеби се поважни е да се осознае многу повеќе за другите култури, да се срушат некои стереотипи кои ги имаме, децата да создадат пријателства меѓу себе, вели Ева Марчинковска, наставничка од Полска.
Своја радио драма во Куманово преку проектот ќе претстават учениците од Турција.
– Во Македонија дојдовме за да ја претставиме радио драмата која ја подготвивме, а воедно и презентација за темата на оваа мобилност, а тоа се младинските проблеми. Многу ми е драго што сме овде, се чувствуваме како дома, со голем дел од колегите веќе се познаваме и може да се каже дека станавме како семејство, изјави Дујгу Јашатурк, наставничка од Турција.
Најголемо задоволство имаат сепак учениците и наставниците од малото италијанско гратче Понтедера лоцирано меѓу Фиренца и Пиза, кои прв пат присуствуваат на средбите, а воедно се и прв пат во Македонија.
– За жал на претходните активности не можевме да учествуваме поради пандемијата и сега сме пресреќни што сме тука и можеме да земеме учество. Многу сме возбудени што сме овде, прв пат сме во Македонија сите од нас, во тимот сме двајца професори и пет ученици и едвај чекаме да ја откриеме вашата земја и љубопитни сме да имаме што повеќе доживувања, изјави Стефано Тани од Италија.
Како што вели Моника Фреире од Порто, Португалија, на претходните работилници се снимени подкасти, а слични активности ќе продолжат и во Куманово.
– Чекаме да видиме што може да научиме ново од вашата држава и вашиот град и да продолжиме воедно со работилниците кои ги почнавме на претходната работилница во Порто. На тие работилници имавме снимања на подкасти, многу активности кои им беа интересни на учениците и се надеваме дека ќе продолжиме и овде, изјави наставничката Фреире.
Во Куманово, учениците од овие европски земји ќе го посетат локалното Радио „Бум“, а ќе освен со знаменистостите на Куманово ќе се запознаат и со Охрид и Скопје.
– Ќе ги посетиме главните знаменистости, во четврток следуваат работилници со невладината ЦИД, ќе имаме презентации за проблемите со младите, ќе одиме во Радио Бум каде ќе снимаме подкасти за проблеми на младите каде учениците ќе се запознаат со работата на радиото, ќе имаме ручек, предивдени прошетки во Куманово, во петок одиме во Скопје и ќе имаат можност за прошетка во мол, а во сабота следува традиционална вечера со овие ученици. Домаќините ќе имаат можност да подготват традиционални јадање, а нашите гости да ги пробаат и вкусат, изјави Филип Младеновски, наставник во кумановската гимназија.
Проектот треба да заврши во Август, а следни домаќини се учениците од Полска.
Никола Ивановски / Стефан Младеновски