Ирански функционер потврди дека неколку средношколци уапсени за време на протестите биле испратени во кампови за превоспитување за да го „едуцираат и корегираат“ нивното однесување откако биле приведени за време на антивладините демонстрации предизвикани од смртта на млада жена во притвор за наводно погрешнo носење хиџаб.
Министерот за образование Јусеф Нури изјави за дневниот весник „Шарг“ на 11 октомври дека учениците биле испратени во кампови, кои тој ги нарекол „психолошки центри“, за да ги спречат да се претворат во „антисоцијални луѓе“.
„Немаме ниту еден ученик во затвор, а доколку бидат приведени, тие се праќаат во психолошки центри каде стручни лица ја вршат својата работа за да можат учениците да се вратат во училишната средина по реформирањето“, рече тој.
Смртта на 22-годишната Махса Амини се случила додека била во притвор откако била приведена од таканаречената морална полиција.
Очевидци рекоа дека Амини била претепана, додека официјални лица рекоа дека таа починала од болест, иако не дадоа докази за да го поткрепат нивното тврдење.
Смртта на Амини на 16 септември предизвика антивладини протести ширум земјата, со многу видеа на кои се гледаат тинејџери студенти ширум земјата како мавтаат со шамии во воздух и извикуваат пркосни антивладини слогани.
Во последните денови имаше извештаи за апсење ученици во училиштата, а се појавија и снимки на социјалните мрежи кои покажуваат дека некои тинејџери демонстранти биле нападнати од безбедносните сили.
На 12 октомври повторно беа пријавени протести во градовите Техеран, Карај, Машхад, Исфахан, Шираз и Рашт.
Голем број демонстранти се собраа на улицата Валијаср, една од главните сообраќајници во Техеран, извикувајќи „Смрт за диктаторот“, во врска со врховниот водач ајатолахот Али Хамнеи, кој ги нарече протестите „расфрлани немири“ инженерирани од Западот.
„Овие расфрлани немири се пасивен и невешт дизајн на непријателот против големиот и иновативен развој и движење на иранската нација“, рече Хамнеи на 12 октомври.
Тој побара од судските и безбедносните службеници на Исламската република „да ја завршат својата должност“ во врска со демонстрантите.
Иранската организација за човекови права (ИЧП) на 12 октомври соопшти дека најмалку 201 лице, вклучително и 23 деца, биле убиени во протестите што го потресоа Иран, а групата со седиште во Осло предупреди дека најверојатно се повеќе смртни случаи како „крвава пресметка.
Иранската влада воведе речиси целосно исклучување на интернетот за да се обиде да ги задуши протестите.
Netblocks, група интернет опсерватории со седиште во Лондон, на 12 октомври објави уште еден „голем прекин“ на интернет сообраќајот во Иран.
NetBlocks соопшти дека интернет сообраќајот во Иран паднал на околу 25 отсто во споредба со неговиот врв, дури и за време на работниот ден кога учениците биле на часови низ целата земја.
„Инцидентот веројатно дополнително ќе го ограничи слободниот проток на информации среде протестите“, рече NetBlocks.