Полскиот премиер Доналд Туск денеска на конгресот на полските учители предупреди дека војната во Украина влегува во решавачка фаза, чиј исход никој не го знае, но се гледа дека таа добива драматични размери и заканата од глобален конфликт станува реален.
„По образование сум професор по историја. Војната на истокот влегува во решавачка фаза. Непознатото се приближува, никој од нас не го знае исходот од тој конфликт. Очигледно зазема многу драматични размери. Настаните од последните десетици часа покажуваат дека заканата од глобален конфликт е навистина сериозна и реална“, рече Туск.
Полскиот премиер апелираше до наставниците да ги подготват своите ученици преку секојдневната работа да бидат отпорни на вакви историски настани.
„Во драматичните настани од руско-украинската војна, едно е очигледно. Безбедни, силни, отпорни нации се оние кои имаат технолошка и интелектуална предност и креативност. Украина сè уште постои првенствено затоа што украинскиот народ се покажа како креативен и многу луѓе успешно се соочија со предизвиците“, рече Туск, пренесува Бета.
Полските власти го осудија вчерашното тестирање на балистичка ракета со среден дострел, способна да носи нуклеарни боеви глави, но без неа, која Русија ја испука на цел во Украина, како руски обид за ескалација на војната.
Шефот на полската дипломатија, Радослав Сикорски, исто така рече дека, како и заканите на Русија за употреба на нуклеарно оружје, меѓу првите цели ќе бидат и заканите дека американската база во Реџиков во северна Полска, која е дел од американскиот противракетен штит, се ништо ново.
„Русија има околу 6.000 нуклеарни боеви глави, доволно за неколкукратно да ја уништи целата планета. Така што не е ништо ново“, изјави вчера Сикорски.
Полскиот министер во Лоѓ изјави дека Путин го заплашува светот со атомска бомба, но очигледно нема да ја употреби и дека само се преправа затоа што има послаби карти во рацете.
„Состојбата на руската армија и економија е полоша отколку што сугерира Кремљ. Ако Русија ја имаше втората најсилна армија во светот, немаше да мора да купува дронови во Иран или стара муниција и да ангажира платеници од Северна Кореја“, изјави шефот на полската дипломатија.