Претседателот на Соединетите Американски Држави, Доналд Трамп, денес изјави дека потпишал писма поврзани со царинските тарифи за 12 земји, кои ќе бидат испратени во понеделник.
Трамп им рече на новинарите во претседателскиот авион дека писмата се конкретни предлози „земи или остави“ во врска со различните нивоа на тарифи за стоки што тие земји ги извезуваат во САД, објави Ројтерс.
Претходно објавената царинска стапка од 10 проценти за повеќето земји беше утврдена во април, а сите освен таа основна стапка беа последователно суспендирани 90 дена за да се овозможи повеќе време за преговори.
Трамп додаде дека тарифите би можеле да се зголемат до 70 проценти во наредниот период, почнувајќи од 1 август.
„Писмата се подобри… многу е полесно да се испрати писмо“, рече Трамп, додавајќи дека процесот на преговори со некои клучни трговски партнери, како што се Јапонија и Европската Унија, наиде на тешкотии.
Досега се постигнати трговски договори само со Велика Британија, која одржува царинска стапка од 10 проценти, и Виетнам, чии производи сега подлежат на пониски тарифи.
Трамп, исто така, во изјава за новинарите во претседателскиот авион објави дека САД ќе започнат разговори со Кина за платформата TikTok во понеделник или вторник.
Претседателот рече дека САД „практично имаат договор“ за продажба на TikTok, додека процесот на продажба на американските операции на TikTok сè уште е во фаза на разгледување, а рокот за негово спроведување е продолжен до 17 септември.
„Мислам дека ќе започнеме во понеделник или вторник… Ќе разговараме со Кина, можеби со претседателот Си или еден од неговите претставници“, рече Трамп, додавајќи дека неговиот однос со кинескиот лидер е „одличен“ и дека договорот е во интерес и на Кина и на САД.
Тој, исто така, рече дека не е сигурен дали Кина ќе се согласи со договорот, но верува дека тоа ќе биде во нивен интерес.
Трамп, исто така, рече дека би можел да го посети претседателот Си Џинпинг во Кина или дека кинескиот лидер би можел да ги посети САД.
Двајцата лидери се поканија еден со друг на посета минатиот месец, пренесува Танјуг.