Свлечиштето во Лас Техеријас, Венецуела, најголемо во последните неколку децении со 36 загинати и 56 исчезнати, е резултат на долгиот период на врнежи поради климатските промени, како и анархичната урбанизација со изградба на куќи во ризичните области.
„Климатските промени влијаат на нас“, изјави Ангел Кустодио, генерален директор на Институтот за метеорологија, за АФП за да ја објасни оваа „нетипична“ година на обилни врнежи.
Феноменот „Ла Ниња“ – топлинска аномалија на екваторијалните површински води на Тихиот Океан што има значителни последици за временските услови ширум светот, од почетокот на оваа година ја зафати Венецуела, поради што врнеше дури и во сушната сезона.
Врнежите се зголемија во април, кога почна сезоната на дождови, а ситуацијата ја влошија депресии, бури и „опашки“ на тропските урагани.
Експертите од Одделот за метеорологија и хидрологија на Централниот универзитет во Венецуела исто така проценуваат дека оваа година ќе биде „петта или шеста“ највлажна во изминатите 70 години.
Септември беше исклучителен месец: паднаа 80 проценти повеќе дожд од месечниот просек за сите рекордни септември.
Свлечиштето во саботата во Лас Техеријас е производ на „природен процес“ на планината, рече специјалистот за геохазард Фелисијано де Сантис.
Кога дождот е континуиран, планинскиот венец од „тектонски“ причини „надува“ и исфрла камења и седименти, објаснува Де Сантис.
И кога населението се населува во загрозените области, се случува катастрофа.