Платформата за социјални медиуми ТикТок и нејзината кинеска матична компанија ByteDance ја тужеа американската влада поради законот со кој би се забранила популарната платформа за видео пораки освен ако не била продадена на друга компанија.
Тужбата поднесена во вторник потенцијално отвора долготрајна правна битка за иднината на TikTok во САД.
TikTok во тужбата вели дека треба да биде заштитен со Првиот амандман на Уставот на САД, кој ја гарантира слободата на изразување. Бараат пресуда дека законот го крши Уставот.
Популарната социјална мрежа вели дека законот потпишан од американскиот претседател Џо Бајден како дел од поголем пакет странска помош од 95 милијарди долари е толку „јасно неуставен“ што нејзините спонзори се обидуваат да го прикажат не како забрана, туку како „регулатива за сопственоста“ на TikTok.
„Конгресот на САД презеде чекор без преседан експресно да го издвои случајот на TikTok и да го забрани како енергичен онлајн форум за заштита на говорот и изразувањето што го користат 170 милиони Американци за создавање, споделување и гледање видеа преку интернет, стои во тужбата.
„За прв пат во историјата, Конгресот усвои закон со кој единствена, именувана платформа подлежи на трајна забрана на национално ниво, забранувајќи му на секој Американец да учествува во единствена онлајн заедница од повеќе од милијарда луѓе ширум светот“, се додава.
Тој закон бара Bytdance, матичната компанија на TikTok, да ја продаде платформата во рок од девет месеци, со можно продолжување за три месеци.
Bytdance соопшти дека не планира да го продаде TikTok.
Но, дури и да сака да ја продаде, компанијата ќе треба да добие одобрение од Пекинг, кој претходно се спротивстави на присилната продажба на платформата и навести дека ќе се спротивстави сега.
Борбата за TikTok доаѓа во време кога односите меѓу САД и Кина се претворија во интензивно стратешко ривалство, особено во области како што се напредната технологија и безбедноста на податоците што секоја земја ги смета за суштински за својата економска одржливост и националната безбедност.
Американските пратеници од двете партии, како и владините и претставниците на органите за спроведување на законот, изразија загриженост дека кинеските власти би можеле да го принудат ByteDance да ги предаде податоците на американските корисници или да влијаат на јавното мислење со манипулирање со алгоритмот кој испраќа видеа на сметките на корисниците.
Противниците на законот велат дека кинеските власти или другите злонамерни страни лесно можат да добијат информации за Американците на други начини и посочуваат дека американската влада не објавила докази дека TikTok ги споделува податоците на американските корисници со кинеските власти или дека прави алгоритамски промени во корист на Кина.
Тие, исто така, велат дека обидите за забрана на TikTok може да ги прекршат правата на слободата на говорот во САД.
Експертот од Универзитетот Колумбија, Џамел Џафер, вели дека предизвикот на TikTok може да успее.
„Првиот амандман значи дека владата не може да го ограничи пристапот на Американците до идеи, информации или медиуми од странство без многу добра причина, а таква причина не постои овде“, рече тој во изјавата.