Талибанската администрација во Авганистан нареди затворање на козметичките салони во рок од еден месец, соопшти Министерството за морал.
Странските влади и претставници на ОН ги осудија зголемените ограничувања за жените откако Талибанците се вратија на власт во 2021 година, откако ја поразија владата поддржана од САД, според Ројтерс.
Минатата година талибанските власти ги затворија повеќето средни училишта за девојки, забранувајќи им на жените да влезат на универзитети и да работат на полето на хуманитарна помош.
Многу јавни места, вклучувајќи бањи, спортски сали и паркови се забранети за жените.
Салоните се појавија во 2001 година
Салони за убавина се појавија во Кабул и други авганистански градови откако Талибанците беа соборени од власт кон крајот на 2001 година, по нападите на 11 септември на САД.
Многумина останаа отворени откако исламистите се вратија на власт пред две години, но со покриени знаци и прозорци.
Западните влади и меѓународните организации сигнализираа дека ограничувањата за жените спречуваат каков било напредок кон меѓународното признавање на талибанската администрација.
Талибанската администрација тврди дека ги почитува правата на жените во согласност со нејзиното толкување на исламскиот закон и авганистанските обичаи.