Тајванската војска во четвртокот објави дека пронашла остатоци од, како што рече, соборен метеоролошки балон, веројатно од Кина, на оддалечен и стратешки важен остров во близина на кинескиот брег, во услови на спор меѓу Кина и САД за балони и шпионажа, пишува Слободна Европа.
Тајван, за кој Кина тврди дека е нејзина територија, во последниве години се пожали на зголемено вознемирување од страна на вооружените сили на Пекинг, вклучувајќи борбени авиони и дронови кои летаат во близина на островот.
Тајванската војска соопшти дека нејзините сили на островот Донџин, дел од тајванскиот архипелаг Матсу, во близина на брегот на кинеската област Фужоу, забележале непознат објект како паѓа од небото, а потоа пронашле остатоци од балон.
Балонот е во дијаметар околу еден метар со кутија со инструменти означена со поедноставени кинески знаци – што се користи во Кина, но не и во Тајван – и зборовите „Taijuan Radio No. 1 Factory Co., Ltd.“, „GTS13 Digital Atmospheric Sounding Instrument“ и „метеоролошки инструмент“, соопшти војската.
Таијуан е голем град на северот на Кина. Ројтерс не можеше веднаш да стапи во контакт со фабриката за да праша за балонот.
„Прелиминарната истрага утврди дека станува збор за остатоци од инструмент за метеоролошка детекција, кој бил собран од надлежниот оддел за понатамошна евалуација“, соопшти тајванската војска.
Говорејќи пред новинарите во парламентот во петокот, министерот за одбрана Чиу Куо-ченг рече дека неговото министерство испратило тим да го испита урнатиот балон.
„Националната армија нема да избрзува со заклучоци врз основа на изгледот. Одговорите ќе бидат дадени дури по истрагата“, рече тој.
Министерството за одбрана на Тајван во вторникот соопшти дека не забележале балони за надзор од Кина во нејзина близина.
Спорот меѓу Пекинг и Вашингтон околу шпионските балони предизвикува загриженост поради зголемените воени тензии.