Напредокот во медицината и поволните социјални услови ќе им овозможат на луѓето да живеат повеќе од 100 години во блиска иднина, а веќе повеќето луѓе во светот може да очекуваат да живеат до седмата деценија, изјави денеска шефот на канцеларијата на Светската здравствена организација (СЗО) во Москва, Батир Бердикличев.
„Современите методи на превенција, подобрената исхрана, поповолните услови за живот и работа, достапноста на медицинска помош, влијаеја на зголемувањето на просечниот животен век. Во секоја земја во светот расте не само бројот на стари лица, туку и нивниот удел во населението“, рече Бердкличев во интервју за ТАСС, одговарајќи на прашањето дали медицината може да ја победи староста до 10 години.
Тој додаде дека сите овие податоци се однесуваат и на Русија.
„Можам да кажам дека меѓу 2020 и 2050 година се очекува населението на возраст од 80 и повеќе години да се зголеми тројно и да достигне 426 милиони луѓе во светот“, рече Бердкличев.
Според него, во блиска иднина, благодарение на напредокот на медицината, особено во областа на генетиката, биотехнологијата и фармакологијата, „животниот век на луѓето ќе се зголеми до можните биолошки граници на човечкото тело“.
„Кои се тие граници? Тешко е да се каже, бидејќи науката може да не изненади. Многу луѓе веќе ја надминаа старосната граница од 100 години. Веројатно горливото прашање во овие услови е дали зголемувањето на животниот век ќе го подобри квалитетот на животот”, нагласи тој.
Шефот на канцеларијата на СЗО во Москва објасни дека на очекуваниот животен век, покрај медицинските фактори, влијае и создавањето поволни социјални и физички услови, вклучително и „способноста на постарите луѓе безбедно да ги посетуваат јавните места, да користат превоз и нивното учество во општеството“.
„Добар пример за таков меѓусекторски пристап е московската програма за активно стареење. Исто така, би сакал да напоменам дека минатата година Санкт Петербург беше првиот руски град кој се приклучи на глобалната мрежа на СЗО прилагодена за постарите луѓе“, додаде Бердкличев, пренесува Танјуг.
Тој изјави дека оваа мрежа вклучува повеќе од 1.700 градови и заедници од повеќе од 60 земји, кои „сите се обединети со една цел – да се создаде подобра средина за постарите жители“.