Речиси секоја земја би можела да доживее екстремно топли години секоја втора година до 2030 година, покажува новото истражување од четвртокот, кое го нагласува огромниот придонес на најголемите светски загадувачи во климатските промени.
Студијата, која разви модели, ги комбинираше податоците за претходните емисии и ветувањата на петте најголеми загадувачи – Кина, САД, Европската унија, Индија и Русија, неколку дена пред климатскиот самит COP26 за намалување на загадувањето за да се предвиди затоплување до 2030 година.
Научниците открија дека 92 отсто од 165-те проучувани земји се очекува да доживуваат екстремно високи годишни температури на секои две години, дефинирани како екстремно топла година што се случувала еднаш во сто години во прединдустриската ера.
Александар Науелс од „Climate Analytics“, кој е коавтор на студијата објавена во списанието „Communications Earth and Environment“, рече дека тоа само по себе е „многу импресивно“.
„Тоа само покажува колку е итно и како одиме во свет кој е многу потопол за сите“, рече тој за АФП.
За да се утврди степенот на придонесот на петте најголеми загадувачи во светот, авторите ја погледнаа сликата без нивните емисии од 1991 година, кога Меѓувладиниот панел за климатски промени (IPCC) прв ги предупреди владите за климатските промени како резултат на човековата активност.
Тие открија дека уделот на земјите погодени од екстремно топлите години ќе се намали на околу 46 проценти.
Леа Беуш, од Институтот за атмосферски и климатски науки на Универзитетот ЕТХ во Цирих, која го водеше истражувањето, рече дека студијата открила „јасен отпечаток“ на активностите на најголемите загадувачи на регионално ниво.
„Мислам дека тоа е многу важно, бидејќи обично зборуваме за апстрактни количини на емисии или глобални температури, за кои знаеме, но навистина не можеме да ги почувствуваме“, рече таа.
„Регионалните климатски промени се многу поблиску до она што ќе го доживееме – ќе го доживееме ова затоплување во нашата земја и оваа зголемена фреквенција на екстремно топли години“, велат научниците.
Тие најдоа најголемо влијание, во однос на зачестеноста на екстремно топлите години, во тропска Африка.
„Бидејќи ова е регион кој традиционално има прилично ниска температурна варијабилност од година во година, дури и умереното затоплување што ќе го доживее, во споредба со другите региони, навистина го исфрла од познатите климатски рамки“, рече таа.
Но, таа додаде дека најголемиот вкупен пораст на температурата е во северните области на голема географска ширина, кои се загреваат побрзо од тропските.
Авторите нагласија дека предвидувањето за зачестеноста на екстремните години може да се промени доколку земјите значително ги засилат своите напори за намалување на загадувањето.
Според сегашните планови, емисиите ќе се зголемат за 13,7 проценти до 2030 година, според УНФЦЦЦ, тело за климатски промени, кога тие мора да се намалат за околу половина за да може да се постигне лимитот за затоплување од Парискиот договор од 1,5 степени Целзиусови.