Србин заработи 30-дневен притвор под сомнение дека шверцувал мигранти кон Куманово

Сподели со своите пријатели

Државјанин на Република Србија се товари за кривично дело криумчарење мигранти, а постапувајќи по кривична пријава на Министерството за внатрешни работи – Регионален центар за гранични работи Југ, надлежниот јавен обвинител од Основното јавно обвинителство за гонење на организиран криминал и корупција донесе наредба за спроведување на истражна постапка против странскиот државјанин.

Во текот на вчерашниот ден, осомничениот, по претходен меѓусебен договор за паричен надомест, со уште едно непознато  лице од подрачјето на Гевгелија прифатиле и кон Куманово превезувале неутврден број на мигранти. Осомничениот со својот автомобил превезувал вкупно 11 мигранти, од кои седум биле малолетни лица.

„Новина во кривично правните настани на криумчарење на мигранти е појавата на  државјани на Република Србија како извршители на ова кривично дело. Сторителите, користејќи  го екот на туристичката сезона и транзитот на голем број на туристи од Србија кон Грција по коридорот Куманово-Гевгелија по Вардарската долина, ги прикриваат своите криминални активности на сметка на зголемената фреквенција на сообраќајот. Тие како туристи легално влегуваат во Република Македонија и се движат со возила со странски регистарски ознаки по овој коридор, што во обратна насока е позната рута по која се движат мигрантите.

Кај досегашните криминални групи што Основното јавно обвинителство за гонење на организиран криминал и корупција и Министерството за внатрешни работи во голема мера ги десеткуваа, како што е предметот „Којот“, кај непосредните извршители подолг период наназад не се пронаоѓаа и запленуваа парични средства, бидејќи плаќањето се извршуваше преку организатори и посредници. Дека станува збор за нова појава говори фактот што во новиот облик кај извршителите од Србија наплатата на криминалниот приход  е непосредно од мигрантите. Во вчерашниот случај кај сторителот се пронајдени и одземени 1.700 евра за кои основано се сомнева дека потекнуваат од предметното и претходно извршени кривични дела на криумчарење мигранти.

Истрагата треба да утврди дали паричните средства се криминален приход или се од легално потекло. Министерството за внатрешни работи  презема мерки за откривање и на вториот извршител“, велат од Јавното обвинителство.

На предлог на надлежниот јавен обвинител од Основното јавно обвинителство за гонење на организиран криминал, судијата на претходна постапка од Основниот суд Скопје 1 – Скопје на осомничениот му определи мерка притвор во траење од 30 дена.


Comments are closed, but trackbacks and pingbacks are open.