Иницијативата „За наше Куманово“ се огласи со реакција на изјавите на министерот за внатрепни работи Оливер Спасовски, во која се изразува „длабоко жалење за тоталното непознавање на состојбите и реализираните проекти во општина Куманово“.
„За да бидат работите појасни, изјавата на министерот Спасовские е дадена при отворање на штаб во населба Средорек, токму од улицата која е целосно изведена нова канализациона мрежа и е асфалтирана од страна на општината и градоначалникот Максим Димитриевски. Општина Куманово во населбата Средорек во изминатите три години направи капитални инвестиции и целосно го смени ликот на населбата, со изведба на нова канализација, асфалтирање и бекатонирање на главната и на сите споредни улички.
Со тоа ги реши децениските комунални проблеми на граѓаните во оваа населба, кои на секои избори наназад добиваа празни ветувања од Спасовски, којшто и денеска вешто се обидува да манипулира со нив.
Најдобриот суд ќе го дадат граѓаните на 17 октомври. Тогаш министерот ќе сфати кој на кого треба да се извини. Го повикуваме министерот, наместо притисоци врз граѓаните на општина Куманово и злоупотреба на системот на МВР во изборни цели, да се посвети на својата работа, за да не ја носи Македонија на столбот на срамот, во која инспектори од МВР ќе бидат апсени на граници со огромно количество на дрога и психотропни супстанци во службено возило на министерството, како и да го расчисти случајот со бројните опожарувања во Куманово и во целата држава“.