Католичката црква, овој пат во Ирска, се соочува со ужасните резултати од истрагата за бруталноста и мизогинијата со која се соочуваат невенчаните млади жени со децении, со смрт на дури 9.000 новороденчиња во sидовите на 18 институции наречени домови за мајки и деца.
Ирската влада го одобри објавувањето на финалниот извештај за истрагата, изјави вчера Родерик О’Горман, министер за деца и млади.
„Извештајот јасно покажува дека Ирска со децении има угнетувачка и брутална мизогинистичка култура, во која стигматизацијата на мајките и нивните деца им ја одзема иднината“, рече О Горман, нарекувајќи го извештајот на 2.865 страници значаен момент за нацијата.
– Во следните недели и месеци, владата многу внимателно и детално ќе го разгледа извештајот со цел да развие сеопфатен акционен план кој опфаќа осум теми: пристап кон преживеаните, извинување, пристап до лични податоци, архивирање и база на податоци, едукација и истражување, меморијализација, ресторативно признавање и достоинствено погребување – забележа тој.
Премиерот Мајкл Мартин рече дека извештајот опишува многу темно и тешко поглавје во ирската историја.
– Како држава, мора да се соочиме со целосната вистина од нашето минато – рече тој и додаде дека „тешката вистина е дека целото општество беше соучесник“ во овој скандал.
– Ова си го сторивме самите на себе, се однесувавме крајно лошо кон жените, крајно лошо се однесувавме кон децата – рече тој.
– Имавме целосно изопачен став кон сексуалноста и блискоста, а младите мајки и нивните синови и ќерки беа принудени да ја платат ужасната цена на таа изопаченост. Како општество, ние прифативме перверзен верски морал и контрола – рече премиерот.