Шпанија денеска накратко го затвори воздушниот простор над Каталонија и уште три региони поради очекуваниот пад на остатоци од кинеска ракета, соопштија властите.
Според астрономите, најголемиот дел од кинеската ракета-носач „Long March 5B“, која на 31 октомври го лансираше модулот на кинеската орбитална станица, денеска неконтролирано ќе влезе во атмосферата.
Потсетуваме дека на Земјата ќе паднат меѓу 5 и 10 тони отпад од ракетен блок од 21 тон, а се проценува дека тоа би можело да се случи во 12:20 плус/минус 3 часа.
„Поради ризикот од поминување на вселенскиот објект CZ-5B низ шпанскиот воздушен простор, летовите се целосно ограничени од 09:38 до 10:18 часот во Каталонија и други области“, соопшти регионалната служба за итни случаи.
Европската вселенска агенција соопшти дека остатоците од ракетата најверојатно ќе влезат во атмосферата над средината на Атлантикот и ќе паднат во океанот, но предупреди дека северна Шпанија, Португалија и јужна Италија се на потенцијалниот пат.
„Статистичката веројатност за влијание врз земјиштето во населените места е мала“, соопштија од оваа служба, додавајќи дека попрецизна прогноза е можна само откако отпадот ќе влезе во атмосферата.