„Нуклеарните постројки во Иран не смеат да бидат нападнати“, рече Рафаел Гроси, шеф на Меѓународната агенција за атомска енергија (МААЕ) во Техеран, по заканите за таа цел упатени од Израел.
„Нуклеарните капацитети на Иран не смеат да бидат нападнати“, рече Гроси на прес-конференција.
Израел се заканува со напад
Новиот израелски министер за одбрана во понеделникот рече дека Иран е „повеќе од кога било изложен на можноста за напад врз неговите нуклеарни постројки“.
Гроси денеска е во Техеран за да ги продолжи преговорите за иранската нуклеарна програма.
Според иранската државна новинска агенција ИРНА, тој прво разговарал со министерот за надворешни работи Абас Аракчи.
Предвидено е Гроси да се сретне и со шефот на иранската Организација за атомска енергија, Мохамад Еслами, и првпат да разговара со претседателот Масуд Пезешкијан, кој важи за умерен.
Гроси неодамна изрази загриженост поради порастот на високо збогатен ураниум во Иран.
Аракчи рече дека Иран е подготвен да ги реши споровите со нуклеарната агенција на ОН за неговата нуклеарна програма, но дека тоа нема да го направи под притисок.
„Ние сме подготвени да преговараме врз основа на нашиот национален интерес и неотуѓиви права, но не сме подготвени да преговараме под притисок и заплашување“, нагласи Аракчи.
Европските сили се залагаат за нова резолуција на одборот на Меѓународната агенција за атомска енергија (МААЕ) против Иран следната недела за да го притиснат Техеран поради, како што гледаат, лошата соработка, изјавија дипломати за Ројтерс во средата.
За време на претходниот мандат на новоизбраниот американски претседател Доналд Трамп, кој повторно треба да ја преземе функцијата во јануари, САД се повлекоа од договорот од 2015 година меѓу Иран и неколку светски сили, чија цел беше да ја ограничи неговата нуклеарна програма во замена за слабеење на санкциите.