Под слоганот „Шарена револуција“, граѓаните на Куманово вчеравечер по шести пат го кренаа гласот против одлуката за аболиција на политичарите, но и бараа оставка од претседателот Иванов, како и одложување на датумот на изборите.
Протестниот марш кој започна пред Основниот суд во Куманово, а во организација на граѓанското движење „Протестирам“ продолжи по улицата „Гоце Делчев“,по што протестантите се упатија кон улицата „Бајрам Шабани“ и кон „Тонко Димков“, односно под Соколански парк, по што преку градскиот плоштад повторно се вратија пред судот.
Маршот заврши во мирна и демократска атмосфера, без инциденти и обезбедуван од полициските службеници. Протестантите повторно ќе се соберат по завршување на велигденските празници.