Северна Кореја рано утринава истрела две балистички ракети со краток дострел во Источното Море, како што изгледаше како одговор на американското распоредување на нуклеарно вооружена подморница во Јужна Кореја за прв пат по децении.
Началникот на здружениот генералштаб на Јужна Кореја соопшти дека во периодот од 3:30 до 3:46 часот утринава Северна Кореја истрелала две балистички ракети со краток дострел од област во близина на главниот град Пјонгјанг.
Тие прелетале околу 550 километри пред да паднат во водите источно од Корејскиот полуостров.
Слична проценка за ракетите направи и јапонската војска, која додаде дека ракетите паднале надвор од ексклузивната економска зона на Јапонија и дека нема извештаи за оштетување на бродови или авиони во таа област.
Должината на летот на севернокорејските ракети одговара на растојанието помеѓу Пјонгјанг и јужнокорејскиот град Бусан, каде вчера попладне пристигна американската подморница УСС Кентаки, во првата посета на американска подморница со нуклеарно оружје на Јужна Кореја од 1980-тите.
Лансирањето ја означува првата балистичка активност на Северна Кореја од 12 јули кога тестираше нова интерконтинентална балистичка ракета со цврсто гориво што покажа дека потенцијално може да достигне длабоко во копното на САД.
Лансирањето беше надгледувано од севернокорејскиот лидер Ким Џонг Ун, кој вети дека дополнително ќе ги зајакне нуклеарните капацитети на неговата земја во услови на проширување на американско-јужнокорејските воени активности.
Тензиите се зголемија во регионот во последните месеци, бидејќи се интензивираа тестирањата на севернокорејското оружје и американско-јужнокорејските воени вежби.
Лансирањето на ракетата беше извршено во време кога САД и некои други земји се обидуваат да обезбедат ослободување на американскиот војник кој вчера побегна во Северна Кореја од јужнокорејската страна на пограничното село.
Војникот Тревис Кинг, за кој се вели дека е во раните 20-ти години, штотуку бил ослободен од јужнокорејски затвор под обвинение за напад.
Наместо да се качи во авион и да се врати назад во воената база во Тексас, тој се придружил на обиколката на пограничното село Панмунџом, од каде што претрчал преку границата во Северна Кореја, изјавија американските власти.