Најважниот гасовод што ја снабдува Германија со руски гас, Северен тек 1, од денеска нема да работи поради ремонт, како што најави претходно операторот, што ја зголемува вознемиреноста во Германија дека тоа може да значи целосно „затегнување на вентилот“.
Работите ќе траат до 21 јули, па за време на ремонтот веќе нема да има испораки на гас од Русија за Германија.
Министерот за економија Роберт Хабек изрази страв дека Русија веќе нема да испорачува гас дури и по ремонтот.
Веќе во јуни Русија значително ги намали количините што ги испорачува за Западна Европа, со објаснување за проблемот поради исчезнатата турбина.
Според податоците на Федералната агенција за мрежа, Германија добивала само околу 40 отсто од својот гас преку Северен тек.
Германија добиваше помали количини гас и преку други гасоводи.
Властите во Берлин претпоставуваат дека исклучувањето на „Северен тек 1“ може да трае подолго од најавеното, можеби и до две недели.
Сепак, стравот е поголем од продолжувањето на ремонтот дека Северниот тек може да остане без гас и по завршувањето на работите.
Германскиот вицеканцелар и министер за економија Хабек рече дека го очекува најлошото сценарио.
„Се е можно, се може да се случи. Можно е да се испорача повеќе гас, повеќе од досега, но може да има и целосен прекин на испораките“, нагласи тој, јави Танјуг.
Овој страв го дели и германската индустрија, пред се хемиската и фармацевтската, која е голем потрошувач на енергија.
Директорот на VCI, Волфганг Гросе Ентруп, рече дека индустријата се подготвува да ги намали или дури и да ги запре испораките.
Според него, проблемите прво би ги почувствувале компаниите на југот и југоисточниот дел на Германија поради гасоводниот систем, додека северот и западот би можеле полесно да се снабдуваат преку пристаништето.
Во големите компании како BASF, Merck или ThyssenKrupp, во тек се подготовки за вонредна ситуација.
Од ThyssenKrupp велат дека можностите за заштеда на гас во производството се речиси минимални.
Ограничувањето на снабдувањето со гас, велат тие, би значело и ограничување на производството.