Јужнокорејскиот претседател Јун Сук-Јол денеска изјави дека Сеул не планира сопствено нуклеарно оружје и покрај зголемените нуклеарни закани од Северна Кореја.
Тој го повика Пјонгјанг да се врати на дијалогот и денуклеаризацијата со економски придобивки.
Јун на прес-конференција рече дека Јужна Кореја не сака политички промени во Северна Кореја кои би биле наметнати со сила и повика на дипломатија за да се изгради одржлив мир меѓу двете земји, во време кога има тензии поради забрзаната програма за оружје на Пјонгјанг.
Неговите забелешки дојдоа неколку дена откако тој предложи „храбар“ пакет економска помош за Северна Кореја доколку се откаже од својата програма за нуклеарно оружје, истовремено избегнувајќи остри критики за Пјонгјанг, кој се закани со „смртоносна“ одмазда за избувнувањето на „Ковид-19“, за што таа ја обвини Сеул, јави Танјуг.
Тензиите би можеле дополнително да се зголемат следната недела, бидејќи САД и Јужна Кореја ќе ја започнат својата најголема заедничка воена вежба во последните години, чија цел е да се спротивстави на заканите од Северна Кореја, која ги нарекува таквите маневри како проба за инвазија и често одговара на нив со ракетни тестови или други провокации.