Исландските глечери, на кои им се заканува истребување до 2200 година, веќе изгубиле 750 км2 површински простор од раните 2000-ти, или седум проценти од вкупната површина, поради глобалното затоплување, покажа новото истражување.
Вкупно, областа на глечерите, кои сè уште опфаќаат нешто повеќе од 10 проценти од таа островска држава, падна во текот на 2019 година на 10.400 км2, според публикацијата во научното списание Јокул (исландски глечер).
Од 1890 година, областа на глечерот е намалена за скоро 2.200 км2, или за 18 проценти. Но, скоро третина од тој пад се случил од 2000 година, според последните податоци на исландските експерти за глечери, геолози и геофизичари.
Повлекувањето за две децении претставува скоро вкупна површина на Хофсјакул (810 км2), трета по големина глацијална капа на северноатлантскиот остров.
„Површинските промени на ледниците на Исланд од 1890 година покажуваат јасен одговор на климатските промени“, потенцираат научниците.
„Промените беа главно истовремени низ целата земја, иако силното движење на мразот и вулканската активност под мразот влијаат на некои области“, додаваат тие.
Во 2014 година, Исланд беше сведок на првото исчезнување на еден од неговите глечери во Окјекул, поради глобалното затоплување.