Европската унија (ЕУ) воведе санкции против иранска компанија и тројца ирански генерали за поткопување на територијалниот интегритет на Украина со испорака на дронови на Русија за употреба во војна.
Русија е обвинета за бомбардирање на електрани и друга инфраструктура со беспилотни летала Шахед од Иран.
Како одговор, ЕУ воведе замрзнување на имотот на Шахед авијациската индустрија во Иран, како и замрзнување на имотот и забрана за патување на тројца службеници, кои исто така се осомничени за врски со иранската програма за дронови.
Во соопштението од Брисел се наведува дека санкциите се „сигнал за решеноста на ЕУ брзо и решително да одговори на иранските акции кои ја поддржуваат руската агресија врз Украина“.
Иран ги отфрли обвинувањата дека испратил проектили и беспилотни летала во Русија за да ги користат руските сили во инвазијата на Украина.
Иранскиот министер за надворешни работи Хосеин Амир-Абдолахиан на Твитер објави дека телефонски разговарал со високиот претставник на Европската унија за надворешна политика и безбедност, Жозеп Борел, за ова прашање.
Амир-Абдолахиан ги отфрли тврдењата дека Иран испраќа проектили и дронови во Русија како „неосновани“ и додаде дека земјата има „одбранбена соработка со Русија, но испраќањето оружје и дронови против Украина не е политика“.
Сите информации поврзани со најновите случувања со војната во Украина можете да ги прочитате ТУКА.