Од почетокот на војната во Украина, бројот на Руси кои доаѓаат во Белград постојано се зголемува.
Најпрво се интересирале за луксузни недвижнини кои ги изнајмувале, но ситуацијата се променила.
Сега Русите почнале да купуваат станови во главниот град, за што се подготвени да потрошат повеќе од 200.000 евра, пишува Нова.рс.
Како што истакнува економистот и извршен директор на агенцијата за недвижности Сити Експерт Милош Митиќ, Белград е еден од балканските градови кои отсекогаш биле интересни за странските граѓани кои сакаат да купат недвижен имот.
„Со понатамошниот развој на градот и пазарот и доаѓањето на странски компании, побарувачката на странските граѓани има јасна тенденција на раст. Во моментов во рамките на таа побарувачка се издвојуваат руските граѓани, кои по огромната побарувачка за изнајмување станови во Белград и Нови Сад, сега почнаа да купуваат.
Побарувачката на руските граѓани започна во текот на мај, потоа се зголемуваше сè повеќе, за да го достигне својот врв во овие месеци“, вели Митиќ за Нова.рс, додавајќи дека се предвидува интересот на Русите за купување станови во главниот град на Србија ќе продолжи и во наредниот период.
Со кеш купуваат станови
Пред само три месеци, агентите за недвижности процениле дека 95 отсто од Русите кои дошле во Белград сакаат да изнајмуваат станови, но ситуацијата се менува и сега се повеќе од нив се заинтересирани за купување.
Кога станува збор за финансирање на нови недвижности, Митиќ посочува дека Русите обично ги плаќаат становите во готово.
Моментално побарувачката е најмногу насочена кон станови со помала квадратура, но има и Руси кои се заинтересирани за поголеми и луксузно опремени имоти.
„Една конкретна група руски граѓани бара скапи станови во големи комплекси, каде што имаат се – паркинг, гаража, теретана… А тоа се претежно станови со цена од над 200.000 евра“, објаснува соговорникот, додавајќи дека пред војната во Украина, минорен беше бројот на руски државјани кои бараа станови во Белград.
Се разликуваат две групи
Меѓу сите Руси кои купуваат станови во Белград, јасно се издвојуваат две групи.
„Првата група се купувачи кои генерално бараат помали станови, во општини кои се подалеку од центарот и цените на овие станови се и до 100.000 евра. Втората група ја сочинуваат купувачи кои се многу поспособни за плаќање, кои претпочитаат станови во комплекси во централните општини на Белград, како што се Белград на вода, Запад 65, Блок А, Нови Дорќол, Централ Гарден и слично. Цените на овие станови се од 3000 евра за квадрат и повеќе. Тоа се претежно станови од 60 до 90 квадрати, со најмалку една спална соба“, заклучува Митиќ.
Сите информации поврзани со најновите случувања со војната во Украина можете да ги прочитате ТУКА.