Руската Федерална служба за безбедност (ФСБ) уапси неколку лица кои некогаш работеле во државната одбранбена индустрија, наводно поради испраќање доверливи документи во Украина.
Агенцијата во вторникот објави дека уапсените руски државјани работеле како агенти за главната украинска разузнавачка агенција, додавајќи дека тие се осомничени за „пренесување техничка документација и примероци од воени производи што се користат за производство на оружје и воена опрема“ што ги користеле руските воздухопловни сили, пишува RT.
ФСБ тврди и дека агентите подготвувале диверзантски напади со кои сакале да ја оштетат железницата во руските региони Курск и Белгород на границата со Украина.
Тие, наводно, конкретно се фокусирале на железничките рути кои превезуваат опрема за руските сили вклучени во „специјална воена операција“, додава агенцијата.
За време на рацијата, оперативците заплениле повеќе од четири килограми експлозив, четири детонатори, проектна документација и неколку воени предмети, соопшти ФСБ, без да даде дополнителни детали. Агенцијата запленила и околу 150.000 долари од осомничените.
Како што продолжува конфликтот меѓу Москва и Киев, руските безбедносни служби во последните месеци ги засилија напорите да ги неутрализираат украинските агенти кои сакаат да собираат податоци за воените инсталации на Москва или да извршат диверзантски напади.
ФСБ тврди дека минатата есен спречила украински план да го уништи рускиот гасовод што ја снабдува Турција, а во мај тие наводно пресретнале група украински саботери кои планирале да нападнат далноводи што водат до две нуклеарни централи во Русија, со цел да „предизвика затворање на нуклеарните реактори и сериозно оштетување на руската економија и углед“.
Сите информации поврзани со најновите случувања со војната во Украина можете да ги прочитате ТУКА.