Вчера Долниот дом на рускиот парламент со големо мнозинство во своето прво читање го одобри законот со кој се забранува посвојување руски деца од граѓани на земји каде промената на полот е легална.
Овој предлог-закон ќе мора да помине низ уште две читања во Државната дума пред да биде испратен до Горниот дом, а потоа до претседателот Владимир Путин.
Во последниве години, Путин и другите високи функционери се повеќе повикуваат на почитување на „традиционалните вредности“ наспроти западниот либерализам.
Претседателот на Државната дума, Вјачеслав Володин, изјави дека нацрт-законот има за цел „да ги заштити децата и традиционалните вредности“ и дека ќе влијае на граѓаните на десетици земји, пренесува Асошиејтед прес.
„Неопходно е да ги заштитиме нашите деца од опасностите со кои може да се соочат при посвојување или старателство од државјани на странски земји каде е дозволена промена на полот“, рече тој.
ЛГБТК движењето забрането како екстремистичко
„Не е дека рускиот морален компас и моралните основи имаат за цел само да ги заштитат традиционалните вредности и разбирањето на бракот како заедница на маж и жена, туку тоа е директна заштита на животот на детето“, додаде потпретседател на парламентот Ирина Јароваја.
Минатата година, рускиот Врховен суд го забрани ЛГБТК движењето како екстремистичко.
Во 2022 година, Путин потпиша закон со кој се забранува дистрибуција на ЛГБТК информации на луѓе од сите возрасти, проширувајќи ја забраната издадена во 2013 година која се однесуваше на дистрибуција на контроверзен материјал на малолетници.
Русија, исто така, планира законски да ја забрани јавната пропаганда на идејата за доброволно избирање да нема деца.
Додека бројот на руски жители се намалува, Путин во своите изјави се залагаше за создавање многудетни семејства, а минатата година ги повика жените да имаат дури осум деца, пишува index.