Заменик министерот за надворешни работи Сергеј Рјабков изјави дека политиката на Северноатлантската алијанса е исклучително ризична и може да доведе до конфликт меѓу нуклеарните сили.
„Деструктивната насока на земјите од НАТО да продолжат да ги игнорираат нашите „црвени линии“ и да влезат во конфронтација со Русија, балансирајќи на работ на директен вооружен конфликт, е крајно ризична“, рече Рјабков.
Тој додаде дека таквата политика може да доведе до „воен конфликт меѓу нуклеарните сили со страшни последици“.
Тој предупредува дека таквото сценарио мора да се спречи и додаде дека земјите што поседуваат нуклеарно оружје мора да се придржуваат до постулатот за недозволивост на меѓусебна војна.
„Со влошувањето на украинската криза, која беше предизвикана по вина на режимот на Киев и неговите западни покровители, оваа порака не само што не ја изгуби важноста, туку и доби дополнително значење“, рече заменик министерот за надворешни работи, како објави државната руска новинска агенција РИА Новости.
Тој, исто така, потсети дека руската доктрина хипотетички дозволува употреба на нуклеарно оружје, но само како одговор на агресија што ќе повлекува употреба на оружје за масовно уништување против самата Русија и нејзините сојузници или во случај постоењето на земјата да биде загрозено.
„Со други зборови, употребата на нуклеарно оружје од страна на Русија е можна само како одговор на напад – за самоодбрана во вонредни околности. Тука нема место за нагаѓања и фантазии“, заклучи заменик министерот.
Сите информации поврзани со најновите случувања со војната во Украина можете да ги прочитате ТУКА.