Србија, единствената европска земја која одби да воведе санкции кон Русија поради нејзината инвазија на Украина, се согласила да го снабдува Киев со оружје или веќе испратила оружје, се вели во доверлив документ на Пентагон, пишува Ројтерс.
Документот, збир на одговори од европските влади на барањата на Украина за воена обука и оружје, е меѓу десетиците доверливи документи објавени на интернет во последните неколку недели, што може да биде најсериозното протекување на американски тајни во последните неколку години, додаде Ројтерс.
„Европа/Одговор на тековниот конфликт меѓу Русија и Украина“, како што се нарекува овој документ, ги наведува позициите на 38 европски влади како одговор на барањата на Украина за воена помош.
Списокот покажува дека Србија одбила да обезбеди вежби за украинските сили, но ветила дека ќе испрати оружје или веќе го испратила, пишува Ројтерс и додава дека исто така наведува дека Србија има политичка волја и воена способност да и обезбеди оружје на Украина во иднината.
Документот е класифициран како доверлив и НОФОРН (Не може да се ослободи за странски државјани), кој забранува негово дистрибуирање до странски разузнавачки служби и војска.
Тој е датиран на 2 март и го носи печатот на канцеларијата на Здружениот штаб, објаснува Ројтерс.
Сепак, Ројтерс не можеше независно да ја потврди автентичноста на документот.
Контактирале и со кабинетот на српскиот претседател Александар Вучиќ и со Амбасадата на Украина, но тие веднаш не одговарале на прашањата, а ист е случајот и со Пентагон, кој претходно одби да ги коментира објавените документи.
Сите информации поврзани со најновите случувања со војната во Украина можете да ги прочитате ТУКА.