Рускиот претседател Владимир Путин денеска изјави дека украинските специјални служби стојат зад нападот што минатата сабота го оштети мостот на Крим.
Тој оцени и дека терористичките напади на гасоводите Северен тек 1 и 2 се преземени за да се наруши енергетската стабилност на Европа и дека тоа се акти на меѓународен тероризам.
Руската Федерална служба за безбедност (ФСБ) претходно денеска соопшти дека терористичкиот напад на мостот на Крим го организирале Главната разузнавачка управа на Министерството за одбрана на Украина и нејзиниот началник Кирил Буданов, а во досегашната истрага се уапсени осум лица. објави Интерфакс.
Како што се наведува во соопштението на ФСБ, службата привела пет државјани на Русија и тројца државјани на Украина и Ерменија во рамки на истрагата за терористичкиот напад на мостот на Крим, а за организатор на терористичкиот напад е прогласена украинската воена разузнавачка служба.
ФСБ соопшти дека истрагата за нападот продолжува, а сите нејзини организатори и соучесници, „вклучувајќи и странски државјани, ќе одговараат во согласност со руските закони“, пренесе Интерфакс.
Нападите на Северен тек 1 и 2 се меѓународен тероризам
Путин рече дека терористичките напади на Северен тек 1 и 2 биле преземени за да ја поткопа енергетската стабилност на Европа и дека се акти на меѓународен тероризам.
Путин истакна дека Русија би можела да ја пренасочи испораката на гас од оштетените гасоводи „Северен тек“ да оди преку Црното Море и дека во Турција ќе го изгради најголемото складиште за гас за Европа.
Во светот владее економска криза и Русија е подготвена да испорача дополнително количество енергија во текот на зимата, а на Европа е да преземе дополнителни чекори, рече Путин на меѓународниот енергетски форум во Москва.
Оние кои сакаат да ги прекинат врските меѓу Европа и Русија стојат зад саботажата на Северен поток, посочи Путин.
Тој истакна дека еден крак од Северен тек 2 е безбеден.
Рускиот претседател верува дека САД можеби се обидуваат да ја натераат Европа да купи американски течен природен гас.
Путин истакна дека Русија не може да влијае на високите цени на енергенсите што ќе ги плаќаат европските земји оваа зима и го обвини Западот дека ја поттикнува светската енергетска криза.
Рускиот претседател посочи дека земјите во развој ќе платат највисока цена поради зголемените цени на енергијата.
На форумот наречен „Руска енергетска недела“ учествуваат лидери и претставници на најголемите светски енергетски компании, како и водечки експерти во индустријата.
Главна тема на форумот е иднината на руската нафтена и енергетска индустрија и меѓународната соработка и развој во тој сектор.
Сите информации поврзани со најновите случувања со војната во Украина можете да ги прочитате ТУКА.