Рускиот претседател Владимир Путин потпиша закон за повлекување на ратификацијата на Договорот за сеопфатна забрана на нуклеарни тестови (CTBT), пишува РИА Новости.
Документот е објавен на веб-страницата на официјалните правни акти.
Законот за повлекување на ратификацијата на CTBT му го достави на Путин претседателот на Долниот дом на рускиот парламент, Вјачеслав Володин.
Потписот на Путин официјално го укинува членот 1 од законот „За ратификација на Договорот за сеопфатна забрана на нуклеарни тестови“, со кој се предлага ратификација на CTBT, потпишан во име на Руската Федерација во Њујорк на 24 септември 1996 година.
Договорот за сеопфатна забрана на нуклеарни тестови беше потпишан во 1996 година.
Сепак, голем број земји, вклучително и Соединетите Американски Држави, се уште го немаат ратификувано, за разлика од Русија, која го направи тоа во 2000 година, пишуваат руските медиуми.
Во исто време, земјите кои поседуваат нуклеарно оружје доброволно ветија дека нема да вршат такви тестови.
Во март, заменик-министерот за надворешни работи на Руската Федерација Сергеј Рјабков истакна дека ситуацијата околу CTBT станува се поалармантна поради активностите на Соединетите држави.