Рускиот претседател Владимир Путин изјави дека не може да се исклучи целосен конфликт со НАТО на прес-конференција во Москва по повод неговата „победа на претседателските избори“, за кои нашироко се верува дека биле наместени.
„Во случај на сериозен конфликт со НАТО, светот би бил на само еден чекор од Третата светска војна“, рече Путин, а пренесе руската државна агенција ТАСС доцна вчера.
„Мислам дека е малку веројатно некој да го сака тоа“, додаде тој.
„Во Украина загинаа бројни војници од членките на НАТО“
Според Путин, во Украина веќе се распоредени бројни војници од земјите членки на НАТО.
„Тоа веќе го знаеме“, рече тој, додавајќи дека на бојното поле веќе се слушаат француски и англиски.
„Тоа не е добро, особено за нив, бидејќи таму умираат во голем број“, рече Путин, кој не презентираше никакви докази за тоа тврдење.
Повеќе од две години Украина се брани од Русија со помош на Западот.
Руската изборна комисија објави дека Путин постигнал рекорден резултат и добил нешто помалку од 88 отсто од гласовите, по речиси една четвртина од преброените ливчиња.
На претходните претседателски избори во 2018 година победи со 76,7 отсто од гласовите.
На изборите кои траеја три дена не беше дозволено да учествува ниту еден вистински кандидат на опозицијата.