Рускиот претседател Владимир Путин ја поздрави растечката енергетска индустрија на неговата земја и пошироките економски врски со Анкара во четвртокот, додека тој и турскиот претседател Таип Ердоган учествуваа преку видео врска на церемонијата на инаугурација на првиот турски нуклеарен реактор, пренесува Ројтерс.
Руската државна нуклеарна компанија Росатом ја изгради нуклеарната централа Акују, а вчера се одржа церемонија по повод полнењето на нуклеарно гориво во првата енергетска единица.
„Ова носи взаемна економска корист и, се разбира, помага да се зајакне повеќеслојното партнерство меѓу нашите две земји“, рече Путин.
Путин ја опиша Акуја како „најголемиот нуклеарен градежен проект во светот“ и истакна дека тоа би значело дека Турција ќе мора да увезува помалку руски природен гас во иднина.
„Но, Турција ќе ужива во предностите на земја која има своја нуклеарна енергија, а нуклеарната енергија, како што знаете, е една од најевтините“, додаде тој.
Според Ројтерс, Ердоган му се заблагодарил на Путин за поддршката на Акују.
„Ќе преземеме чекори за што поскоро изградба на втората и третата нуклеарна централа во Турција“, рече тој.
Тесни врски
Турција е членка на НАТО, но Ердоган успеа да одржи срдечни односи со Путин и покрај војната во Украина.
Минатата година, Турција заедно со Обединетите нации помогнаа да посредуваат во договорот што овозможи продолжување на извозот на украинското жито од пристаништата на Црното Море.
Во телефонскиот разговор пред церемонијата во Акују, Ердоган и Путин разговарале и за ситуацијата во Украина и за договорот за житото во Црното Море, соопшти кабинетот на Ердоган.
Путин, кој сака да изгради нови пазари за руските јаглеводороди надвор од Европа, го повтори својот повик Турција да стане регионален гасен центар „за снабдување со природен гас за заинтересираните странски купувачи по пазарни цени“.
Проектот Акују вреден 20 милијарди долари вклучува изградба на четири реактори кои ќе и овозможат на Турција да се приклучи на мал клуб на нации со цивилна нуклеарна енергија.
„Планираме да го завршиме физичкиот старт (на централата) следната година… за да можеме континуирано да произведуваме електрична енергија од 2025 година, како што се договоривме“, рече Андреј Лихачев, шеф на Росатом, во Мерсин пред церемонијата.
Ердоган, исто така, се приклучи на церемонијата во четвртокот преку видео врска наместо да отпатува таму поради лошо здравје што го принуди да ги откаже предизборните собири оваа недела.
Турскиот министер за здравство Фахретин Коџа изјави дека Ердоган се чувствува подобро во четвртокот.