Русија не е ваш непријател, им порача рускиот претседател Владимир Путин на граѓаните на западните земји и истакна дека Москва е подготвена за преговори, но не и Киев.
Учествувајќи во дебатата во дебатниот клуб „Валдаи“ во Москва, каде што рече дека светот се соочува со најопасната деценија од Втората светска војна, бидејќи западните елити се труделе максимално да го спречат неизбежниот колапс на глобалната доминација на САД и нивните сојузници, Путин го обвини Западот дека игра „опасна, крвава и валкана“ геополитичка игра, ширејќи хаос низ светот.
„Борете се за вашите плати“, одговори Путин на прашањето што ќе им каже на обичните граѓани и нагласи: „И не верувајте дека Русија е ваш непријател. Русија никогаш не била злонамерна кон Европа и САД“.
„Западот на крајот ќе мора да разговара со Русија“
Во својата критика на западните земји, рускиот претседател рече дека Западот на крајот ќе мора да разговара со Русија и другите сили за иднината на светот.
„Историскиот период на доминација на Западот во меѓународните односи е при крај“, рече Путин.
„Ние сме на историски крстопат: пред нас е веројатно најопасната, непредвидливата и во исто време најважната деценија од Втората светска војна“, додаде тој на конференцијата на клубот за дискусија „Валдаи“.
Тој ги обвини западните лидери дека прават големи грешки што доведоа до економска и енергетска криза.
Русија беше најголемиот снабдувач на гас за Европа, која ја казни Русија со серија пакети санкции за нејзината агресија врз Украина.
Како резултат на тоа, Европа се сврте кон алтернативни извори и добавувачи, а Русија бара нови клиенти на Исток.
Русија ќе им дозволи на своите партнери во Азија да и помогнат да развие широка енергетска мрежа, рече Путин.
Во таа насока, тој ги пофали големите односи меѓу Москва и Пекинг, рече дека влијанието на Индија рапидно расте и најави дека предлага влез на Саудиска Арабија во БРИКС (група брзорастечки економии, Бразил, Русија, Индија, Кина и Јужна Африка).
„Москва е подготвена за преговори“
Рускиот претседател изјави дека Москва е подготвена да разговара за завршување на конфликтот во Украина, но Киев не е подготвен да седне на преговарачка маса.
„Ова не се однесува на нас, ние сме подготвени за преговори. Но, лидерите во Киев одлучија да не ги продолжат преговорите со Русија“, рече тој.
„Многу е лесно да се реши проблемот само ако Вашингтон му сигнализира на Киев да ја смени својата позиција и да го реши проблемот по мирен пат“, рече Путин.
Украинската и руската делегација ги прекинаа разговорите по два обиди во првите недели од конфликтот, а претседателот Володимир Зеленски експлицитно ја отфрли можноста за преговори со Путин.
„Говорот на Путин не е ништо ново“, одговори Белата куќа.
Зборовите на Путин не укажуваат на никаква промена во стратешките цели, а тоа ја вклучува Украина, изјави портпаролката на Белата куќа Карин Жан-Пјер.
Запрашан за можноста за нуклеарна војна, Путин рече дека опасноста од употреба на атомско оружје ќе постои се додека постои тоа оружје.
„Западната самодоверба и мултиполарниот свет“
Цитирајќи го предавањето на Харвард од 1978 година на рускиот дисидент Александар Солженицин, Путин рече дека Западот е отворено расист и го гледа остатокот од светот со презир.
„Ова нивно верување во сопствената непогрешливост е опасна ситуација“, рече Путин, додавајќи дека Русија никогаш нема да прифати Западот да му кажува што да прави.
„За разлика од Западот, ние не ѕиркаме во туѓите дворови“.
„Таканаречениот Запад го стави на коцка целиот свет во оваа игра, а таа игра е опасна, крвава и, би рекол, валкана“, рече Путин.
„Поговорката вели: како сееш, така и ќе жнееш“, додаде тој на конференцијата на која присуствуваа експерти од 44 земји.
„Отсекогаш верував и верувам во здравиот разум и убеден сум дека порано или подоцна новите центри на мултиполарниот свет и Западот ќе мора да разговараат за заедничка иднина како рамноправни партнери. Колку побрзо, толку подобро“, нагласи Путин.
Тој го нарече конфликтот во Украина борба меѓу Западот и Русија за судбината на втората по големина источнословенска држава.
Тоа е делумно „граѓанска војна“ бидејќи Русите и Украинците се еден народ, рече Путин.
Киев силно ги отфрла двете идеи.
Прилагодување на руската економија
Путин рече дека постојано размислува за загубите на Русија во Украина. Но, само Русија може да го гарантира територијалниот интегритет на Украина, нагласи тој.
Тој ги отфрли како лудило тврдењата дека Русија ги оштетила гасоводите под Балтичкото Море, Северен тек 1 и 2, со експлозии.
Русија нема потреба од национализација за да ја надомести штетата од економските санкции со кои Западот ја казнува поради војната во Украина, изјави понатаму рускиот претседател.
Тој го нарече заминувањето на западните компании од Русија „подарок“ за локалните инвеститори и бизнис секторот бидејќи тие се прилагодиле на новонастанатата ситуација.
Тој ги нарече „луди“ тврдењата на западните земји дека Русија стои зад експлозиите кои ги оштетија гасоводите под Балтичкото Море.
Данската полиција утврдила дека силните подводни експлозии предизвикале истекување на гас на цевководите Северен тек 1 и 2, што може трајно да ја загрози нивната функционалност.
Путин претходно го обвини Западот дека го прекинува протокот на гас преку чин на саботажа, а европските лидери ги отфрлаат таквите тврдења и ја обвинуваат Русија.
Путин во четвртокот рече дека гасоводот под Балтичкото Море работи, но Европа не сака да го користи.
Русија беше најголемиот снабдувач на гас за Европа, која беше поттикната од војната во Украина да бара алтернативни извори.
Путин во четвртокот рече дека гасот е најдобриот извор на енергија во преодната фаза.
– Транзицијата кон јаглеродна неутралност не е против руските интереси, тврди тој.
Нуклеарно оружје – се чека одговорот на САД за договорот
Нуклеарната доктрина на руските воени сили е одбранбена, рече Путин и ги отфрли тврдењата дека Русија има намера да употреби нуклеарно оружје во Украина.
„Русија е подготвена да ги продолжи разговорите со САД за контрола на нуклеарното вооружување, но не доби одговор од Вашингтон на нејзиниот предлог за разговори за стратешка стабилност.
Во својот говор Путин рече дека во неговата земја има прозападни граѓани, но тврди дека има консензус кога станува збор за справување со надворешен непријател.
„Руската православна црква е со својот народ, така беше порано и така е денес“.
Си е пријател, Ердоган исто така
Кинескиот претседател Си Џинпинг е „близок пријател“, рече Путин и оцени дека односите со Кина се на „највисоко ниво досега“.
Тој имаше пофални зборови и за неговиот турски колега Реџеп Таип Ердоган, кого го нарече „силен лидер“ кој секогаш ги брани „турските интереси“.
Ердоган не е секогаш „лесен партнер“ за преговори, но Турција отсекогаш била „сигурна“ и подготвена да постигне договори, рече тој.
Ердоган одигра клучна улога во преговорите меѓу Киев и Москва од почетокот на конфликтот бидејќи успеа да посредува за постигнување договор за извоз на жито од пристаништата на Црното Море и помогна во преговорите за размена на воени заробеници.
Ова се единствените успешни договори од почетокот на руската агресија на крајот на февруари.
Сите информации поврзани со најновите случувања со војната во Украина можете да ги прочитате ТУКА.