Обединетите нации тврдат дека завојуваните страни во Јемен се договориле да го продолжат сегашниот прекин на огнот за уште два месеци, и покрај меѓународниот притисок за подолго и пошироко примирје, пренесува Ројтерс.
Специјалниот пратеник на ОН за Јемен Ханс Грундберг рече дека меѓународно признатата јеменска влада и бунтовничките Хути се согласиле да го продолжат примирјето.
„Продолжувањето на примирјето вклучува посветеност на страните да ги интензивираат преговорите и да постигнат поширок договор што е можно поскоро“, рече Грундберг.
Длабока недоверба
Претставникот се залагаше за шестмесечно примирје со дополнителни мерки, според новинската агенција Ројтерс, но двете страни имаа поплаки за спроведувањето на постојниот договор за примирје, додека меѓу нив постои длабока недоверба.
Официјални лица на САД и Оман исто така се ангажираа со завојуваните страни да го поддржат предлогот на Грундберг по посетата на американскиот претседател Џозеф Бајден на Саудиска Арабија минатиот месец, каде што тој објави договор за „продлабочување и проширување“ на прекинот на огнот по билатералните разговори.