Земјотресот со јачина од 7,8 степени според Рихтеровата скала што рано утринава ја погоди јужна Турција е еден од најсилните што земјата ги доживеала во повеќе од 100 години снимање, соопшти Геолошкиот институт на Соединетите држави (USGS).
USGS објави дека подеднакво силен земјотрес со јачина од 7,8 степени според Рихтеровата скала ја погодил источна Турција и во 1939 година, при што загинале повеќе од 30.000 луѓе.
Карл Ланг, доцент на Универзитетот Џорџија Техника, за Си-Ен-Ен изјави дека областа погодена од земјотресот е подложна на сеизмичка активност.
„Тоа е многу сеизмички активна област. Таму има многу голема зона на расед, но ова е поголем земјотрес отколку што тие доживеале во поновата историја“, рече Ланг.
Помалку од пет такви силни земјотреси годишно во светот
Земјотреси од оваа јачина се ретки, во просек, помалку од пет годишно во светот.
„Она што е навистина невообичаено овде е тоа што се работи за многу голем земјотрес кој исто така е блиску до површината“, рече Ланг.
Во изминатите 25 години Турција беше погодена од неколку силни земјотреси. Седум од нив биле со јачина од 7 или поголема, но утринава била најсилна, јавува CNN.
Тоа е, исто така, најсилниот земјотрес во светот од 2021 година, кога земјотрес со јачина од 8,1 степени според Рихтеровата скала го погоди оддалечениот регион во близина на Јужните Сендвич Острови во јужниот дел на Атлантскиот Океан. Тогаш немаше никаква штета.
Сите информации поврзани со најновите случувања во Турција можете да ги прочитате ТУКА.