Нема шанси Украина да се приклучи на Европската Унија додека не го признае масакрот во Волин како геноцид, изјави заменик-премиерот на Полска, Владислав Косињак-Камиш.
„Ако Украина не се помири со фактот дека се случил геноцид, ако нема ексхумација или комеморација, нема да има шанса да се приклучи на Европската Унија“, рече тој.
Сепак, тој истакна дека одбивањето да ја поддржи Украина во војната со Русија би било „спротивно на безбедносните интереси на полската држава“.
Десетици илјади Полјаци беа убиени
Во 1943 година, припадници на Украинската бунтовничка армија (УПА) масакрираа десетици илјади Полјаци во Волин, Полска, регион кој сега е дел од западна Украина.
Илјадници Украинци беа убиени како одмазда.
Украинскиот историчар Серхиј Плохи, директор на Украинскиот истражувачки институт на Универзитетот Харвард, проценува дека бројот на полски жртви на масакрот се движи од 60.000 до 90.000.
Бројот на Украинци убиени од Полјаците во 1940-тите се проценува на помеѓу 10.000 и 20.000, вклучувајќи помеѓу 2.000 и 3.000 во Волин, според полскиот историчар Гжегож Мотика.
Масакрот во Волин долго време е Ахилова пета на украинско-полските односи.
Половина од Полјаците веруваат дека Украина не треба да се приклучи на НАТО или на Европската Унија сè додека не се реши прашањето за ексхумација на жртвите од масакрот во Волин, според анкета објавена на 30 јануари.
Растечки предизвици за полско-украинските односи
Во јули, новиот полски претседател, Карол Навроцки, го повика украинскиот претседател, Володимир Зеленски, да дозволи целосна ексхумација на полските жртви од масакрот во Волин.
Во понеделник, Навроцки стави вето на закон со кој ќе се прошири финансиската поддршка за украинските бегалци.
Дополнително, тој предложи доделување бенефиции само на оние Украинци вработени во Полска, продолжување на периодот потребен за добивање полско државјанство, построги казни за нелегални преминувања на границите и изедначување на украинските националистички симболи со нацистичките и комунистичките симболи.
Навроцки, конзервативец поддржан од опозициската партија „Право и правда“, тесно победи на претседателските избори во Полска на 1 јуни со 50,89% од гласовите.
Станува збор за историчар кој влегол во политиката. Неговото доаѓање на претседателската функција сигнализира растечки предизвици за полско-украинските односи.
Иако ја потврди поддршката за борбата на Украина против руската агресија, тој се изјасни против аспирациите на Киев да се приклучи кон ЕУ и НАТО.