Премиерите Матеуш Моравиецки од Полска и Петр Фиала од Чешка на консултациите на нивните влади побараа Европската унија и НАТО да обезбедат поголема финансиска помош за нивните земји поради миграцијата и воените бегалци од Украина што ги примија и поради одбранбените потреби на „Источното крило“ на НАТО, пренесува агенцијата Бета.
Во Катовице, на југот на Полска, Моравјецки им рече на новинарите дека „групата Вагнер, која се појави во уште поголем број во Белорусија, е зголемена закана за Полска и „источното крило“ на НАТО“.
Тој оцени дека „Белорусија и Русија работат рака под рака за да ја дестабилизираат Полска и источните области на НАТО и ЕУ“.
„Солидарноста мора да биде изразена и во повеќегодишниот буџет за кој се разговараше во Европскиот совет. Мора да се испратат дополнителни средства за помош на бегалците од Украина што ги прифативме“, рече тој.
Проширување на Балканот
Чешкиот премиер Фиала истакна дека Варшава и Прага имаат различни пристапи кон предлогот за европска политика за азил во смисла на солидарност со земјите погодени од неа и рече дека Чешка прифаќа задолжителна солидарност и преселба, но дека главната цел заедничка за двете земји е миграцијата да се реши на надворешните граници на Унијата.
„Мораме да се погрижиме солидарноста да не засега и нас. Да се убедат земјите-членки и властите на ЕУ да ни пружат поголема помош од претходно. Илегалната миграција е нехумана, таа тргува со човечка беда. Убеден сум дека треба да го решиме овој проблем пред овие луѓе да ги преминат границите на ЕУ“, рече тој.
Полскиот премиер истакна дека ЕУ мора да го задржи донесувањето одлуки со консензус и во однос на илегалната миграција.
„За Полска, повеќе Унија значи ЕУ проширена на Западен Балкан, Украина, а не Унија со зголемување на бирократијата, таква Унија не води никаде. Консензусот е брана што ја штити безбедноста на помалите, бидејќи кога има големи разлики за важни прашања, мора да се бара консензус“, смета Моравјецки.
Клаузула за дозволен дефицит
Полска инсистира реформата на политиката за азил и преместувањето на бегалците да се одлучува со консензус на самитите на ЕУ, каде што ќе има право на вето, а не да се одлучува со мнозинство на ниво на амбасадори или министри, каде што може да биде надгласано.
„Мораме да ги ограничиме надлежностите на ЕУ на оние содржани во основните договори, а не да му ги даваме на Брисел, како Брисел подобро да знае што и треба на Јеленија Гора (град во Полска), Прага или Варшава“, изјави шефот на полската влада.
На консултациите на полската и чешката влада во Катовице, една од главните теми беше војната во Украина и безбедноста.
„Знаеме дека безбедноста чини пари. Денеска разговаравме дека трошоците за одбрана треба да бидат исклучени од клаузулата за дозволен буџетски дефицит на земјите-членки на ЕУ. Украина и државите на границата со Русија се безбедносен кордон и целата ЕУ и НАТО мора да го разберат тоа и финансиски да го оценат онаму каде што е потребно“, рече Моравјецки.