Јужна Европа, САД и делови од Азија се зафатени од топлотни бранови, а Грција се бори со големи пожари.
Делови од јужна Европа се соочуваат со топлотен бран кој носи највисоки температури оваа година.
Европската вселенска агенција денеска прогнозираше 48 степени целзиусови за Сицилија и Сардинија, но други синоптичари очекуваат дека највисоката температура таму ќе биде околу 46°C.
Италијанците се предупредени од властите да се подготват за „најинтензивниот топлотен бран на летото и еден од најинтензивните на сите времиња“.
Франција денеска очекува температури над 40 целзиусови степени во некои делови од земјата, предупреди француската метеоролошка агенција.
Корзика и делови од јужна и југоисточна Франција ќе бидат погодени од највисоки температури, според Метео Франс, а ноќните температури „ќе останат високи“.
Шпанија се бори со третиот топлотен бран ова лето.
Во Мадрид температурите ќе достигнат речиси 40 степени, по што ќе се спуштат до 30 степени и викендот повторно ќе почнат да растат.
Температурите во Грција во последните денови се искачија над 40 целзиусови степени.
Властите беа принудени да го затворат атинскиот Акропол минатиот петок и повторно во текот на викендот.
Македонија е во портокалова фаза до следниот вторник што значи опасност од температури кои ќе достигнуваат 40 и повеќе степени во следните денови.
Предупредувања за екстремна топлина и во Јапонија
„Екстремните временски услови имаат големо влијание врз здравјето на луѓето, екосистемите, економиите, земјоделството, енергијата и снабдувањето со вода. Ова ја нагласува растечката итност да се намалат емисиите на стакленички гасови што е можно побрзо и колку што е можно повеќе“, рече генералниот секретар на Светската метеоролошка организација, Петери Таала.
Предупредувања за екстремни температури беа издадени и во јапонскиот главен град Токио и пет околни области, заедно со 16 други префектури во јужна Јапонија.
Температурите достигнаа 37,4°C во Токио околу пладне и 38,4 во Кумагаја, северно од Токио, а попладне се очекува дополнително да се зголемат.
Со прогнозата дека живата денеска ќе достигне 40 степени целзиусови во Нагоја, централна Јапонија, училиштата ги откажаа спортските и другите активности на отворено.
Температурни рекорди вчера беа поставени и во Европа
И вчера ширум Европа беа забележани екстремно високи температури. Температурата достигна 45,7 степени во Виланова, Сардинија, што е нов европски рекорд за оваа година.
Климатологот Максимилијано Херера објави дека паднале и месечните рекорди: 42,8°C во Толедо во Шпанија, 38°C во Кампобас во Италија, 41°C во Зеница во Босна и Херцеговина, но и 17,5°C во Исола во Франција, на 1912 метри надморска височина.
European Heat Wave:
Temperature rose as high as 45.7C at Villanova, In Sardinia,Italy, new 2023 European highest.Few monthly records fell today:
42.8C Toledo,Spain tied
38.0C Campobasso,Italy
41.0C Zenica, Bosnia tied
27.5C Isola 2000 (1912m asl), FranceHotter tomorrow pic.twitter.com/MOsXPNHL4j
— Extreme Temperatures Around The World (@extremetemps) July 17, 2023
Големи пожари во Грција
Како што јави Ројтерс, пожарите продолжуваат неконтролирано да беснеат во шумите во областа Дервенохорија, на околу 30 километри северно од Атина, но пожарникарите успеале да ги локализираат другите пожари во западниот и југоисточниот дел на грчката престолнина.
Активни се повеќе од 80 шумски пожари, од кои четири се големи.
Пожарот што избувна во понеделникот во селото Куварас, на околу 27 километри југоисточно од Атина, слабее.
Запален од променливите ветрови, пожарот брзо се прошири во крајбрежните градови Анависос, Лагониси и Саронида, принудувајќи ги луѓето да ги напуштат своите домови.
Претставник на грчката противпожарна служба во вторникот изјави дека 230 пожарникари со помош на 76 противпожарни возила и пет хеликоптери се уште работат на различни места во областа.
„Силите на цивилната заштита се бореа цела ноќ“, рече Јоанис Артопоиос.
Дебел слој бел чад беше видлив од Атина додека трет пожар се јави во близина на приморското одморалиште Лутраки, на околу 80 километри западно од главниот град.
Дел од Грците во погодените подрачја се разбудија со апокалиптични сцени, а на некои куќите им беа целосно изгорени.
Грчките пожарникари со денови се борат со пожарите предизвикани од ветерот во Беотија, североисточна Атика, Лутраки и Дервенохори.
Во некои случаи, пожарникарите, поддржани од воздухопловните сили, се бореа во текот на ноќта за да го изгаснат пламенот.
Војници и волонтери и помагаат на националната противпожарна служба.
Во вторникот имаше извештаи дека тројца доброволни пожарникари се полесно повредени додека се бореа со пожарите околу крајбрежниот град Саронидес, јужно од Атина.
Голем пожар и во Шпанија
Шумските пожари во Ла Палма на Канарските острови, кои избувнаа во саботата, зафатија 4.650 хектари, уништувајќи 20 куќи и принудувајќи ја евакуацијата на илјадници луѓе, пренесува Ројтерс.
Гори и во Калифорнија
Шумски пожар беснее и во долината на Калифорнија, која поради топлотниот бран се соочува со рекордно високи температури.
Пожарникарите продолжија да се борат со големиот шумски пожар во близина на Бомонт во округот Риверсајд.
Пожарот почна да гори во петокот и зафати повеќе од 3.200 хектари.
Според податоците од пожарникарската служба на округот Риверсајд, до понеделник тој бил 35% содржан.
Предупредувањата за топлотни бранови остануваат на сила во регионот бидејќи сегашниот топлотен бран продолжува да носи тешки услови во Централна Калифорнија.