Ирмгард Фурхнер, 97-годишната поранешна секретарка на командантот на СС во концентрационен логор, можеби е последната личност на која ѝ се суди за нацистички воени злосторства.
„Секретарот на злото“ имала само 18 години кога отишла да работи кај командантот на концентрациониот логор Штутхоф каде загинале повеќе од 60.000 луѓе.
На Ирмгард Фурхнер ѝ се суди повеќе од една година, а пресудата се очекува денеска.
Таа беше обвинета за учество во 11.412 убиства за време на нејзината работа во кампот, кој се наоѓа во близина на денешен Гдањск во Полска.
Обвинителите тврдат дека таа им помагала и ги поттикнувала одговорните во логорот во систематското убивање на оние кои биле затворени меѓу јуни 1943 и април 1945 година како стенограф и дактилограф во канцеларијата на командата на логорот.
Фурхнер, која главно одбиваше да одговара на прашања за време на судењето, во своите завршни зборови рече дека ѝ е жал за тоа што се случило и дека во тој момент била таму.
Професорот Рајнер Шулце, германски историчар и професор на Универзитетот во Есекс, рече дека „ова веројатно ќе биде последно судење на нацистите за воени злосторства“.
Фурхнер е првата жена на која ѝ се суди во Германија за злосторства од нацистичката ера во последниве децении.
Се проценува дека околу 100.000 луѓе биле депортирани во логорот Штутхоф за време на војната.
Зад оградите од електрична бодликава жица што го опкружувале, условите биле брутални.
Многу затвореници умреле од тифус, додека оние за кои чуварите сметале дека биле премногу слаби или болни за да работат, биле убиени.
Штутхоф е запаметен и по последните денови кога се приближи Црвената армија, а шокантните настани што се случиле додека илјадници затвореници биле преместени од чуварите на логорот под изговор за „евакуација“.
„Ги ставија во мали чамци кои ги турнаа во Балтичкото Море. Луѓето умираа во тие чамци поради изложување на сонце, без вода, без храна“, рече професорот Шулце.