Во четвртокот вечерта имаше нова престрелка во Србија во која загинаа осум лица, а најмалку 14 беа ранети.
Напаѓачот бил уапсен околу 8 часот во петокот наутро, јавуваат српските медиуми.
Полицаецот М.П. (22) е убиен во крвавиот пир кај Младеновац, кога У.Б. (21) почнал да пука со автоматска пушка.
Пријателите имаат само пофални зборови за жртвата и велат дека тој бил вреден и добар млад човек. Тој беше првата жртва на крвавиот поход. Убиена е и неговата сестра, јавува Нова.рс.
„Седеа и разговараа, тој им пријде. Овој му рекол: „Што правиш?“ Тој извадил калашников од автомобилот и почнал да пука. Соседот кој бил со нив бил ранет, починал во болница“, изјавиле за Блиц дедото на полицаецот и неговата сестра, две од осумте жртви на налудничавиот убиец.
Најмладата жртва е 15-годишно дете, момчето од здобиените повреди починало во болницата во Смедерево.
Министерот за полиција Братислав Гашиќ го окарактеризира овој чин како тероризам.
Српските медиуми објавија фотографија од напаѓачот.
Пукал со автоматска пушка и пиштол. Прво, на една позиција, тој излегол од автомобилот во кој се наоѓал и пукал во група луѓе кои седеле околу камперскиот оган за пикник. Потоа продолжил со крвавиот чин.
Тој се вратил во автомобилот, дошол на друга позиција на неколку километри и излегол од автомобилот и пукал во четири лица кои ја поправале капијата во дворот и на крајот се вратил во автомобилот. Возел до центарот на селото Дубона и повторно пукал.
Таму убил две лица. Полицаецот кој не бил на должност и неговата сестра.
Убиецот потоа побегнал и по него цела ноќ трагаа повеќе од 600 припадници на полицијата.
Ангажирани беа припадници на Управата за криминалистичка полиција, жандармерија, специјална терористичка единица и хеликоптерска единица. Потоа членови од различни организациски единици на полициската управа за град Белград, полициската управа Смедерево, подрачните полициски станици, службените полициски кучиња. Се бараше и со дронови и термални камери.
Конечно убиецот е уапсен утринава.