Панама прогласи вонредна состојба во својот главен регион за производство на банани откако продавниците беа ограбени, а зградите вандализирани за време на тековните протести за пензиската реформа.
Според Би-Би-Си, владата објави дека уставните права ќе бидат суспендирани во следните пет дена во северозападната покраина Бокас дел Торо.
Мерката ја ограничува слободата на движење и ѝ дозволува на полицијата да врши апсења без налог.
Проблемите во регионот започнаа пред еден месец, кога локалниот синдикат на работници со банани се придружи на националниот протест против предложените намалувања на пензиите и повика на штрајк.
„Соочен со нарушување на редот и акти на систематско насилство, државата ќе го спроведе својот уставен мандат за гарантирање на мирот“, рече панамскиот функционер Хуан Карлос Ориљак.
Протестите низ латиноамериканската нација избувнаа во март поради пензиската реформа.
Во Бокас дел Торо, немирите главно ги водеа работниците на плантажата за банани „Чикита Брендс“.
Конфликтот ескалираше минатиот месец откако компанијата отпушти илјадници вработени кои штрајкуваа.
Демонстрантите поставија барикади на патиштата во покраината, честопати судирајќи се со полицијата.
Порано оваа недела, група луѓе оштетија еден од објектите на компанијата „Чикита Брендс“, како и локалниот аеродром.