Граѓаните на Куманово вчеравечер на градскиот плоштад имаа можност да уживаат во големиот музички концерт по повод Денот на ослободувањето на градот.
Огромен број кумановци од најмала до најстара возраст уживаа во различните жанрови музика, сплотени под едно небо различни етникуми пееја заедно песни на различни јазици.
Со песните на македонските пејачи Пајак и Таско започна големиот музички хепенинг, продолжи со косовскиот уметник Барди и нив со големи овации ги поздрави помладата публика.
Кулминација на забавата беше настапот на Ѓорѓе Давид кој ги отпеа најголемите хитови на „Генерација 5“, заедно со Ивана Петерс која не врати во времето на „Негатив“.
Пред присутните се обрати градоначалникот на Општина Куманово Максим Димитриевски кој на младите им порача да ги чуваат Куманово и Македонија.
– Сакам да ви го честитам денот на градот на сите. Да бидеме горди на нашите предци, бидејќи тие се бореле за ова што ние денеска го имаме, а на вас младите сакам да ви кажам да го чувате Куманово и да ја чувате Македонија. 77 години слободно Куманово, 502 години постои Куманово, а вие ќе продолжите понатаму, одиме заедно за наше Куманово, рече Димитриевски.
По говорот на Димитриевски следуваше и традиционалниот спектакуларен огномет.
Како изгледаше целокупната атмосфера во продолжение екслузивно низ објективот на Кумановски Муабети.
Никола Ивановски / Стефан Младеновски