Генералот Сергеј Суровикин, заменик-командантот на руските воени операции во Украина, знаел дека водачот на платениците Евгениј Пригожин планира бунт против военото раководство на Москва, пишува Њујорк Тајмс.
„Њујорк тајмс“ се повикува на американски претставници запознаени со американските разузнавачки служби за бунтот на Пригожин и наведува дека официјалните лица „се обидувале да откријат дали генералот Сергеј Суровикин, поранешниот врховен руски командант во Украина, помогнал во планирањето на акциите на Пригожин минатиот викенд“, пренесува Хина.
Пригожин замина во егзил во Белорусија во вторникот според договорот со кој заврши кусиот бунт на неговите борци Вагнер во текот на викендот, додека претседателот Владимир Путин ги пофали неговите вооружени сили за избегнување на граѓанска војна.
„Њујорк тајмс“ објави дека американските власти, исто така, рекле дека има знаци дека други руски генерали можеби го поддржувале Пригожин.
Ројтерс не можеше независно да го потврди извештајот.
„Генерал Армагедон“
Пентагон сѐ уште не одговорил на барањето на Ројтерс за коментар.
Кремљ и руското Министерство за одбрана, исто така, не одговорија на прашањата на Ројтерс.
Суровикин, кој руските медиуми го нарекуваат „Генерал Армагедон“, во октомври беше ставен на чело на операциите во Украина, но во јануари рускиот министер за одбрана Сергеј Шојгу го назначи началникот на Генералштабот Валериј Герасимов да ја надгледува кампањата, а Суровикин стана негов заменик.
Пред да започне бунтот, Пригожин беснеше и против Шојгу и Герасимов, обвинувајќи ги за неуспехот на кампањата и недостатокот на армиска поддршка за борците на Вагнер.
Суровикин ја повика групата на Вагнер да се откаже од бунтот против военото раководство и да се врати во своите бази непосредно пред Пригожин да ги поведе своите борци на таканаречениот „марш за правда“ кон Москва.
Сите информации поврзани со најновите случувања со војната во Украина можете да ги прочитате ТУКА.