Новата габична инфекција „candida auris“ претставува глобална закана за јавното здравје и може да предизвика сериозни инфекции на крвотокот, рани и респираторни инфекции.
Опасната и ретка инфекција првпат беше идентификувана во САД во државата Њујорк во 2016 година, а истражувачките лаборатории подоцна открија дека габата е присутна во земјата најмалку од 2013 година, пишува АП.
Стапката на смртност се проценува на 30 до 60 проценти, а особен ризик се луѓето кои веќе имаат сериозни здравствени проблеми.
Минатата година, најмногу случаи беа откриени во Невада и Калифорнија, но габичната инфекција беше идентификувана кај пациенти во 29 држави.
Една теорија зад ненадејната експлозија на оваа габична инфекција ги обвинува климатските промени.
Луѓето и другите цицачи имаат потопли телесни температури отколку што можат да толерираат повеќето габични инфекции, така што тие историски биле заштитени од повеќето инфекции.
Сепак, зголемувањето на температурите може да им овозможи на габите да развијат толеранција кон потоплите средини, што на крајот може да предизвика луѓето да ја изгубат отпорноста.
Некои истражувачи веруваат дека тоа веќе се случува со инфекцијата „кандида аурис“.
Патогенот се појави спонтано пред 14 години на три континенти, во Венецуела, Индија и Јужна Африка.
Експертот за габични заболувања Артуро Касадевал, микробиолог, имунолог и професор на Универзитетот Џон Хопкинс, рече дека ова е збунувачки бидејќи климата на овие места е сосема различна.
– Имаме огромна заштита од габи поради температурата на телото. Меѓутоа, ако светот стане потопол и габите почнат да се прилагодуваат на повисоките температури, некои ќе го достигнат она што јас го нарекувам температурна бариера – изјави Касадевал.
Имаше 2.377 потврдени клинички случаи во САД минатата година, што претставува зголемување од над 1.200 проценти од 2017 година, но кандида аурис станува глобален проблем.
Во Европа, минатогодишното истражување покажа дека бројот на случаи речиси се удвоил помеѓу 2020 и 2021 година.
Експертите забележуваат дека иако скринингот и надзорот на инфекции се подобрени, вртоглавиот број на случаи одразува вистинско зголемување.
Луис Остроцки, професор на Медицинскиот факултет во UTHealth Хјустон, верува дека кандида аурис е „некако кошмарно сценарио“.
– Потенцијално е отпорен на повеќе лекови, и има способност многу ефикасно да се шири во здравствените установи. Ваков патоген кога се работи за габични инфекции никогаш не сме имале – рече тој.
Можно е габата отсекогаш да била меѓу микроорганизмите кои живеат во човечкото тело, но бидејќи не предизвикувала инфекција, никој не ја истражувал до неодамна кога почнала да предизвикува здравствени проблеми.
Експертите предупредуваат дека оваа габа претставува сериозна закана за здравјето на луѓето, а најизложени на ризик се пациентите со намален имунитет во болниците, како и луѓето во домовите за стари лица.
Candida auris не само што е предизвик за лекување, туку и тешко е да се дијагностицира, а многу лекари не се свесни дека постои, според АП.